Aruba den top 5 destinacion pa Herfst pa clientenan di compania global di seguro

NEW YORK – E compania global di seguro cu beneficio y asistencia, (IMG), a scohe Aruba entre su top 5 di destinacion pa temporada di hersft (Otoño) e aña aki. Ta trata di un encuesta entre 40 mil di su clientenan. Aruba ta na di dos lugar despues di Mexico y prome cu Italia.  

E pronostico di e compania ta cu e top 5 destinacionan internacional pa biahero lo bira  

Mexico

Aruba

Italy

Bahamas

Republica Dominicana 

Den termino di largura di biahe, mayoria biahero lo tin vacacion di 9 dia, un dia mas largo cu e average pa biahero di herfst di 2022. Tin un aumento tambe den e cantidad di placa cu ta gasta riba e biahenan aki. Entre e biaheronan di IMG, tin un aumento di 47% den e biahenan sigura compara cu 2022. Cu mas placa inverti den nan biahe, mas biahero ta buscando seguro di biahe, unda cu IMG p.e. a mira un aumento di 34% den compra di plan di proteccion di biahe pa biahenan cuminsando 1 di September (awe) pa 30 di November 2023, compara cu e mesun tempo aña pasa, esta 2022. Un combinacion di biahenan mas largo y aumento di gasto di biahe a conduci pa biaheronan busca mas seguro pa proteha nan vacacion y inversion.