Iberostar Group den 2024 ta inverti 7 miyon dollar pa cancha di golf di Tiera del Sol

ORANJESTAD – E doño nobo di Tiera del Sol, esta e compania Spaño Iberostar Group ta bay inverti 7 miyon dollar den e propiedad cu nan a adkeri mas prome e aña aki. Durante un encuentro diaranson anochi, e director di operacion di Iberostar Americas, Rodrigo Silveyra a splica cu porfin nan a keda cla cu contractonan cu proveedornan y por a planea e trabounan di trabou pa drecha e propiedad, primordialmente e cancha di golf, pa trece na e nivel di ora cu e la habri 28 aña pas ana 1995. Debi na e pandemia y e problema di proveedornan, a tarda basta e aña aki pa por aliña tur e companianan cu mester provee e material pa drecha e cancha y otro aspectonan di golf. Pero awor ta asina leu cu nan ta cla pa cuminsa planea y tin esaki poni pa cuminsa trabou fisico na April di 2024. 

DRECHA E CANCHA

E idea ta pa mantene e cancha habri pa e temporada halto proximo di 2023/2024, pa e ora na luna di April di otro aña cera esaki completamente pa publico pa un periodo di 6 luna, pa nan por haci tur trabou necesario y keda cla na tempo pa habri bek pa e temporada halto 2024/2025. E plan ta sinembargo pa logra minimalisa e effecto di cierre, pa ora cu nan prome hotel na Aruba habri den zomer di 2024, e por wordo usa e ora tambe. No sa exactamente con esaki lo tuma lugar, pero ta suficiente pa bisa cu e lo keda manera nobo. 

E SITUACION ACTUAL

Lamentablemente despues di 28 aña y pasando den man di varios doño, hopi no a haci riba e mantencion y esey a pone cu e calidad di e cancha y e parti di operacion ta laga hopi di desea. Y e compania cu awor ta doño, ta serio cu e planan y tin idea serio pa drecha tur cos, incluyendo full e yerba, y areanan necesario, pa trece bek na un nivel professional, y consecuentemente e ora por ofrece paketenan mucho mas miho y asina cobra loke nan por cobra basa riba e nivel di e cancha. Ademas lo inverti tambe den tur loke tin di haber cu e wega, manera e garoshinan di golf, y tur otro aspecto cu ta bin hunto cu un wega di golf. 

OPERACIONAL

E propiedad en general lo keda operacional, y lo purba minimalisa e trabounan di strobe e bida riba e propiedad. Mester corda cu tin cantidad di doño di cas riba e propiedad, cu ta biba hopi aña eynan y cu mester por tin entrada eynan. Lo haci cambio y ahuste na algun parti di e operacion cu no ta directamente relaciona na golf.