Na Corsou tur bus sin airco a stop di core den protesta pa motibo di calor

WILLEMSTAD - Ayera mainta shofùrnan ku ta kore bùs pa SGR Groep a pone trabou abou. Bùsnan no tin èrko i ta inhumano pa transportá klientenan den e situashon di kalor aki.  E sindikato CBV ku a representá e trahadónan pa medio di su presidente a presentá na SGR na Emmastad pa pone su mes na altura i alabes buska un solushon pa loke tabata pasando.

Segun sra. Analiza Mathilda presidente di CBV a bisa na prensa tur e shofùrnan di bùs a pone trabou abou, na momentu ku a bisa ku no por sigui traha bou di e kondishon aki.

E shofùrnan a bisa ku e bùsnan no ta den kondishon pa kore debí ku nan no tin èrko. E bùsnan aki ta transportá personanan desabilitá entre otro den ròlstul. Sra. Analiza Mathilda a menshoná asta un suseso kaminda un kliente a sinti su kurpa malu, debí na kalor ku ta hasiendo. I e situashon aki CBV no ta aseptá.

E situashon aki ta kousa peliger pa e kliente ya ku mayoria di e bùsnan no tin ni bentana i ta ful será i pa kolmo sin èrko. E kayente den e bùs ta un peliger pa e klientenan. “Nos ta papia di hóbennan, hóben adulto i  mucha. Djis imaginá den ki situashon e hóbennan ta haña nan ora nan drenta bùs kayente. E shofùrnan a bisa ku nan no ta laga nan pashèntnan kore e peliger aki”, segun sra. Mathilda. 

Ayera mainta mes CBV a pidi pa sinta ku gerensia di SGR Emmastad. E reunion a tuma lugá i a disidí ku e bùsnan lo no kore niun aktividat kaminda nan tin di transportá klientenan. E situashon a keda resolvé mesora pero e presidente di CBV ta lamentá ku ta ora e sindikato kai aden ku e problemanan aki ta keda solushoná.

Den salubridat no por atendé di e forma aki. “Nos ta bayendo mas i mas atras.  Añanan ta bai i kosnan tin di drecha’, segun sra. Mathilda. El a manda su palabranan di apresio pa gerensia di SGR ku a duna oido mesora na e situashon i a para tur aktividat di bùsnan ku no tin èrko. NOTA: Texto ta scirbi den Papiamento fonetico di Corsou.