ELMAR: Corto circuito a interumpi servicio di coriente den un parti di Paradera y Santa Cruz

ORANJESTAD – Ta un corto circuito a interumpi servicio di coriente den un parti di Paradera y Santa Cruz . Asina ELMAR su vocero Audrey Croes a informa diamars mainta riba e motibo di perdida di coriente e anochi ey. “ Ayera nochi, nos a enfrenta un situacion inespera den un parti di e area di Paradera y Santa Cruz. Den un esfuerso pa mantene transparencia y comunicacion abierto cu nos clientenan, nos ta duna un relato riba e esfuerzonan cu nos a haci pa soluciona e situacion” Croes a cuminsa. Esey no a kita afo cu riba rednan social, ciudadanonan afecta no tabata nada contento y a vocifera nan descontento grandemente. Esaki cu e combinacion di e calor insoportable, a pone e situacion aun mas desagradabel. 

“Pa mas o menos 7:21 PM, nos sistema di comunicacion di grid a notifica nos cu tin un interupcion den e distribucion di coriente den e areanan di Seroe Biento, Piedra Plat, Pavia, Meiveld, Cumana y vecindario. Nos ekipo tecnico a mobilisa inmediatamente pa atende e situacion aki. Durante esaki, otro team tecnico tabata ocupa cu finalisacion di trabounan di reparacion na Noord, cu a ser afecta pa un accidente di auto involviendo un poste di coriente. Na momento cu e team aki a termina e trabou na Noord, nan a bay reenforsa e otro team cu tabata na e sitio.  Pa mas o menos 7:49 PM, nos tecniconan tabata na e sitio pa identifica y aborda e problema cu a causa e interupcion di servicio di coriente. Nan a duna nan maximo esfuerso pa por identifica e fuente di e problema y a traha duro pa soluciona esaki lo mas pronto posibel. A surgi un corto circuito den e red di alto tension. Na momento cu e tecniconan a identifica esaki por a cuminsa suministra coriente bek. Durante cu a cuminsa duna coriente, a surgi un problema cu un switch di alto tension, esaki a wordo coregi inmediatemente” Croes a sigui bisa. “Pa mas o menos 9:25 PM, a logra reestablece e suministro di coriente den mayoria di e area afecta. Nos tecniconan no a para niun momento pa sigura cu por reestablece e servicio cu nos ta brinda. Pa mas o menos 9:39 PM, a reestablece e suministro di coriente na Seroe Pita. Finalmente, na 10:10 PM, nos a logra completa e tarea pa reestablece e suministro di coriente den tur area afecta”.