Arends: Despues di 3 aña, awe Serlimar a sali for di ‘Surseance van betaling’

ORANJESTAD – Dialuna atardi minister responsible pa Serlimar Ursell Arends a anuncia cu awe 28 di augustus, Serlimar ta sali di su ‘surseance van betaling’. Esaki ta un suspension di pago di debe cu a wordo otorga na e compania pa e por a reorganisa su finansas y operacionnan. “Awor, Serlimar lo por continua di paga tur su debenan y sigui opera di manera regular” e minister a sigui bisa.

PROTECCION TEMPORAL 

E compania sui generis Serlimar a haya su prome proteccion di pago temporal (voorlopig surseance van betaling), inmediato dia 19 di mei 2020 cu tabata un proteccion di corte pa evita posibel bancarota. Hues a dicta esaki ayera riba peticion di su abogado David Kock (DKLegal). Como administrador a nombra abogado Geert Rep. Corte lo mester a dicidi riba 26 di augustus 2020 si e proteccion ta bira uno definitivo. E motibo pa e compania tuma e paso ey, ta debi na e situacion financiero di e compania y su inabilidad di cumpli cu su responsabilidad financiero di paga su debe. Cu e sentencia aki, posibel creditornan (esnan cu Serlimar debe) no por pidi cobransa, of pio ainda, pidi bancarota di e compania pa incumplimento di pago. No ta conoci kico e situacion financiero exacto ta di e compania y si ta ‘solamente’ creditornan e no por paga, of hasta salario y otro tipo di gasto.  

DEFINITIVO

Despues na mei di 2022 Corte a duna Serlimar Sui Generis Surseance van Betaling definitivo, cu ta nifica cu nan ta haya un rosea di 1 aña y mei pa saña nan situacion financiero esta te e luna aki, augustus 2023. Esaki ta nifica cu Serlimar por a keda mas trankil, sin tin e preocupacion di cu creditornan por exigi bancarota di e compania. Huez a scucha tur creditornan y como 90% di e creditornan a bay di acuerdo pa duna mas tempo, y asina por ta tin chens pa nan haya algo di e placa cu nan mester haya. Un di e sumanan mas grandi ta 13 miyon cu Serlimar debe impuesto, sigui pa 8 miyon cu e tin cu otro creditornan. Cu esaki, Serlimar ta keda salba di wordo declara bancarota. Tanto e minister encarga como e abogado tabata contento cu e decision aki.