Partido politico nobo Partido Direccion Politiea ta cla pa eleccion

ORANJESTAD – Partido politico nobo, esta Partido Direccion Politiea, ta cla pa eleccion. Pa cuminsa, e nomber no ta mal scirbi of un typo, esta ‘Politiea’ sino asina e ta segun su lider Leonardo Figaroa. Tabata dia 8 di maart ultimo cu e partido a keda funda oficialmente. Directiva di Partido  ta desea di crea un politica di nivel unda e enfoke ta ariba solucion y con nos ta crea e opportunidadnan hunto cu y pa  Aruba.

Durante e ultimo periodo di e gobernacion, miembronan fundadador a nota cu e cuidadano su poder di compra a bay atras, e situacion economico financiero ta uno deplorabel.Tin un pobresa nobo cu ta reina mei mei di nos pueblo. Ademas derechonan social di cada cuidadano y/of empleadonan cada biaha ta keda oprimi, procesonan democratico cu tin cu sigura cu pueblo no ta perde confiansa den su gobernantenan a keda mina, asina creando precedentenan nobo cu ta peligroso pa nos estado di democracia. Nos salubridad, Enseñansa, Medio Ambiente, justicia, careteranan tur a bay atras, nos ta core rond di Aruba y nota cu tin falta di perspectiva pa un vision solido cu por crea e solucionan cu nos pais tin mester y su cuidadania tanto ta anhela.

“Nos kier ta un alternativa pa empodera cada cuidadano di pais di Aruba. Nos ta mas cu un partido politico, nos ta kere cu basa riba nos statutonan nos tin un obligacion y responsabilidad cu Aruba. Nos ta un Forum politico, un espacio unda cada cuidadano di pais Aruba por forma parti di un dialogo. Nos kier stimula un dialogo pa por crea participacion bek den politica, y connecta e grupo cu ja pa hopi tempo ta sinti cu politica no tin un valor agrega den nan bida. Nos ta kere cu abo tin un contribucion grandi na e progreso di pais Aruba, y nos kier brindabo e forum pa bo por forma parti di e dialogo, forma parti di un política moderno y innovativo” e lider a sigui bisa.

KEN NAN TA?

Partido Direccion Politiea ta un partido cu e ideologia Sociaal-Liberal progressivo unda nan ta kere firmemente den yuda stimula mas participacion di pueblo di e forum democratico, esta Parlamento y gobierno di Aruba mediante nos organisacion politico. Nan kier crea un espacio pa empodera miembronan di partido y tur cuidadano di pais Aruba.

Como un partido sociaal-liberal progressivo nan ta haya e ta crucial pa inverti den e hende, pa crea un prosperidad cu ta wordo reparti justo unda tur hende ta haya e mesun opportunidad pa por alcansa nan metanan y nan soñonan. Semper teniendo cuenta cu nos mama tera y e consecuencianan ecologico.