Còrsou ta bay final Little League World Series seccion internashonal contra Chinese-Taipei

WILLIAMSPORT.- Kòrsou ayera a topa ku e representashon di Mexico, den un wega desisivo. Ganadó di e wega aki lo a pasa pa final di sekshon internashonal miéntras e pèrdèdó lo a keda eliminá. Kòrsou ku un di 6 inning di tres kareda, ta bin bèk pa gana di Mexico ku skor di 4-2. Mexico a pika dilanti den e wega ora nan a anotá un kareda den bòm di 3 inning. Kòrsou a empatá e wega mesora ora ku den kabes di 4 inning, Jayvery Felicia ta anotá riba un bala ku a bai laga e kècher. Wega a sigui empatá te den di 6 inning. Den kabes di e inning aki Kòrsou a sa di anotá na tres okashon pa pika dilanti den e wega ku skor di 4-1. Aki mester señalá ku e coach di primera Ringemar Raap tabata klave mirando korektamente el a mustra riba e echo ku un “call” na primera no tabata out manera umpire a kanta, ku a trese kuné despues ku umpirenan a bai wak i kambi’é. Esaki tabata importante den e inning pa Kòrsou. Mexico den bòm di e inning i a anotá un kareda, i tabatin dos koredó den posishon di anotá pero ku dos out.

Aki Shemar Sophia Jacobus ta poncha e bateadó di Mexico pa saka e último out, i duna Kòrsou e viktoria i alabes e pase pa e final internashonal.

Pa Kòrsou ayera 4 kareda, 4 hit i 2 eror. Picher ganadó tabata Jay-Dlynn Wiel ku a tira un inning i un tèrsio sin tuma kareda limpi. Shemar Sophia Jacobus a salba e wega ora el a tira dos tèrsio sin permití kareda. Miéntras na bate Shemar Sophia Jacobus a bai di 2-2 i Jayvery Felicia a bai di 1-1.

Kòrsou djasabra awor 12.30 or di mèrdia, ta den e final di selekshon internashonal kaminda nan lo bolbe topa ku Chinese-Taipei. NOTA: e texto ta scirbi den papiamento fonetico di Corsou.