Opinion : Pakico RAFT ta necesario pa aruba?

Posted on 08/25/2023 8:42 am AST | Updated on 08/25/2023 8:44 am AST

Scirbi pa Armand Hessels

Na e momento aki Gobierno/Parlamento di Aruba ta envolvi den un discushon intenso cu Hulanda tocante e exigencia di Hulanda pa un RAft (Ley di Reino pa supervishon financiero) remplasa e LAft (Ley di Aruba pa supervishon financiero) cu a institui desde 2014. Tur dos pa motibo cu finansas di Aruba ta(wata) den problema serio como consecuencia directo di e maneho financiero iresponsabel, primordialmente di AVP. E debe di Aruba cu ya caba tawata mucho halto pa un isla chikito manera Aruba, a casi redobla den un tempo record. E debe nashonal di Aruba a bira practicamente impagabel mescos cu e interes cu mester paga tur aña (2024: Af. 300 miyon). Casi no ta resta placa pa invershon necesario pa Aruba bay dilanti (p.e. riba tereno di enseñansa).

Pakico Hulanda ta exigi pa gobierno di Aruba acepta e RAft pa mehora su finansas publico?

- Hulanda no tin confiansa den politico di Aruba pa maneha finansas publico di un manera responsabel. Durante decada, e politiconan di Aruba a neglisha TUR advertencia, conseho y asta palabrashon firma pa mehorashon. Esaki a causa e situashon penibel di finansas publico. Asina nos a yega na un debe di Afl. 5,7 biyon, mas e debe di PPP di Afl. 1 biyon. Pues en total casi Afl. 7 biyon! No tin ningun motibo pa Hulanda kere cu awor sí cos (t)a cambia...

- Un RAft ta mas facil pa Hulanda enforsa. Di otro banda ta mas facil pa Gobierno di Aruba desvia di LAft, manera a pasa p.e. na 2022 ora cu CAft a recomenda un ‘aanwijzing’ (KB).

- Ademas, Parlamento di Aruba no por cambia un RAft, manera e kier a haci algun aña pasa cu LAft pa asina elimina cualke tipo di control di Hulanda.

- Problema principal di gobierno (cu no kier ningun tipo di control efectivo!) pa cu RAft:

- Tin norma extenso pa presupuesto (art. 15)

- Tin regulashon extenso pa atrae prestamo (art. 16 y 16ª)

- Tin regla extenso pa e administrashon financiero y di presupuesto, ademas di control financiero (art. 17-24)

Pero...no solamente Hulanda no ta confia (gobierno di) Aruba, e propio pueblo di Aruba NO tin confiansa den su gobierno/Parlamento pero SÍ mester paga hopi mas interes den caso di LAft:

- Segun encuesta ripiti di Banco Central, 75% di pueblo ta pensa cu tin (basta) corupshon den (departamento di) gobierno.

- Segun e recien investigashon di NIS (e sistema di integridad nashonal), Parlamento ta e pilar di mas debil den e sistema aki.

- Segun encuesta haci na 2015, mas di 75% di pueblo ta desea pa Hulanda supervisa democracia, gobernashon y finansas di Aruba.

- Tanten Aruba no acepta RAft, pueblo (pa motibo di terkedad politico!) mester paga decenas di miyones na interes EXTRA pa aña!

E argumento principal di e dos partidonan grandi di Aruba pa opone contra RAft ta, cu esey ta afecta autonomia di Aruba.

- Ta e propio partidonan aki a caba cu autonomia di Aruba na nada, pa nan maneho financiero totalmente iresponsabel durante decada. Esaki a haci cu Aruba actualmente ta depende completamente di prestamo di otro pais pa sobrebibi (durante Covid) y cubri su debenan.

- Riba dje ta trata di autonomia di (=libertinahe pa) e politiconan y no e autonomia di e pueblo.

Autonomia pa politico = dependencia di pueblo riba (partido) politico pa motibo di patronahe politico

Ademas, e politiconan di Aruba ta argumenta cu supervishon Hulandes na Corsow y Sint Maarten no a yuda e dos islanan aki.

Nan ta neglisha (intencionalmente!) e realidad cu e prome gobierno despues di 10-10-10, a goberna Corsow na un manera criminal, ‘desapariciendo’ multimiyones pa locual asta a encarcela e ministro presidente responsabel. Na St. Maarten tambe (tawa)tin corupshon/malgobernashon na gran escala...