Pa mitar di October, seleccion di futbol di Aruba por hunga su prome ‘home game’ na cas riba yerba nobo!

ORANJESTAD – Contratistanan encarga cu e mehoracion di e Compleho Deportivo Guillermo Prospero Trinidad a cuminsa instala yerba artifical den Compleho Deportivo Guillermo Prospero Trinidad. Diahuebs ultimo, minister di deporte Endy Croes]a bishita Guillermo Prospero Trinidad, unda a combersa cu representantenan di Bohama Aruba N.V. cu ta encarga cu reconstruccion di e veld y ingeniero Sr. Daniel Santos di T3 Global Projects cu ta instalando e yerba artificial. T3 Global Projects ta un compania cu ta instala centenares di veld rond di mundo. E marca di e yerba artificial ta AstroTurf cu ta reconoci rond mundo. Ta calcula cu pa dia 14 di september, e proyecto di yerba artificial lo ta finalisa. E siman despues lo haya e certificacion di FIFA cu e veld ta aproba pa weganan internacional. Minister Endy Croes a indica cu den e siman di 20 di september e representantenan di CONCACAF lo ta presente pa mira e aprobacion aki. CONCACAF a bay di acuerdo pa dia 14 di october Aruba hunga su prome “home game” bek na cas. Lo uza parti pariba di e stadion. Minister Endy Croes a expresa cu e ta hopi contento y orguyoso pa esaki. Ingeniero Sr. Daniel Santos a agrega cu e yerba artificial ta cumpli cu tur rekisito y condicion cu FIFA ta exigi. E ta un yerba certifica pa ricibi e certificacion di FIFA, unda cu e veld por wordo uza pa weganan internacional. E yerba artificial ta di calidad y duradero.