Caribbean Stem Cell Donors tin cooperacion cu Matchis pa yuda pashent Arubiano haya stem cell

ORANJESTAD - Caribbean Stem Cell Donors ta un comicion di voluntario cu e obhetivo di haya un donante di stamcell pa un pashent cu ta ricibiendo su tratamento pa leukemia na Erasmus MC na Hulanda. Durante e proceso di busca un match, a realisa cu no tin un infrastructura pa donante registra den Caribe. Esaki ta importante pa pashentnan cu mester transplante di stemcel por cura di nan enfermedad. 

Cu esaki den mente, e meta di Caribbean Stem Cell Donors a bira mas grandi. Banda di busca un match pa e pashent, nos ta trahando tambe pa crea un infrastructura den Caribe pa tur pashent cu tin nos caracteristica etnico. Asina por tin mas oportunidad di haya un match, por trata nan enfermedad exitosamente y asina por salba mas bida di esnan cu ta bin di Caribe.

E grupo di boluntario a lansa un campaña pa educa, conscientisa y alabes haci un yamada pa personanan registra y forma parti di un Stem Cell Donor Drive.

Mirando e acogida, interes y apoyo den nos comunidad pa cu e iniciativa aki, a aserca Matchis cu ta e fundacion di mas grandi cu ta maneha e database di donantenan di stemcel na Hulanda.  Tambe nan ta encarga cu match pashent y donante.

For di e reunion cu Matchis, Caribbean Stem Cell Donors a logra cera un colaboracion pa organisa un donor drive na Aruba. E colaboracion y acuerdo aki, ta marca un stap grandi den e proceso pa desaroya un infrastructura pa donantenan di stemcel den Caribe den futuro. Esaki lo ta pa prome biaha den historia di Caribe.

Fundacion Matchis a priminti di tuma e encargo di e proceso pa registra donantenan y tambe pa manda Aruba e test kits necesario pa por haci test mediante swab den boca. Un simpel swab ta wordo haci pa por test y registra HLA di cada persona pa determina si tin un match. Den futuro Caribbean Stemcell Donors y Matchis lo continua cu e dialogo pa fortalece e infrastructura y haci esaki uno structura den Caribe.

E acuerdo cu Matchis ta nifica cu tur persona (bou di 55 aña) lo wordo registra directamente den e database na Hulanda. Esaki ta importante paso mayoria pashent di islanan ABC ta wordo trata na Hulanda. Esaki ta sigura cu nos pashentnan por aumenta nan oportunidad di haya un posibel match y donante.

INFORMACION DI E DONOR DRIVE

Pa tur persona cu ta desea di registra pa bira un donante, por tuma contacto cu Caribbean Stem Cell Donors na +297 7381979 (WhatsApp) of riba Instagram na @CaribbeanStemCellDonors y ariba Facebook na @Caribbean Stem Cell Donors pa ricibi mas informacion.