A lanta fundacion “e Poder den Mi” como alternativa pa e.o. eleva den crecemento personal y spiritual

ORANJESTAD - Awor tur esnan cu ta desea, por siña practica e arte di meditacion Estado Alpha pa manifesta tur bo deseonan. Fundacion “e Poder den Mi” a keda oficialmente estableci, cu e meta pa motiva, inspira, eleva y empodera tur esnan cu ta habri pa siña technicanan pa crecemento personal y spiritual y pa laga bo manifesta tur bo deseonan. 

Fundacion “e Poder den Mi” ta un organisacion ‘alternativo spiritual’ sin fines di lucro (non profit) dedica na comparti e enseñansanan transformador di luminares di e ‘Pensamento Nobo’ (New Thought) manera Dr. Joseph Murphy, Neville Goddard, Conny Mendez, José Silva y Louise Hay. Guia pa nan sabiduria, e fundacion ta yuda hende den nan caminda spiritual, despertando nan potencial interno y expandiendo nan consenshi.

Mediante nos programanan, tayer y recursonan, nos ta provee enseñansanan profundo riba e potencial di e mente subconsciente, manifestacion, y principionan di filosofia di e ‘Pensamento Nobo’ (New Thought). 

Ademas, nos ta ofrece sesionnan di meditacion Estado Alpha pa facilita relahamento profundo y claridad mental. E sesionnan aki ta yuda hende yega na e estado di onda cerebral alpha, un estado di receptividad y creatividad eleva. Cu practica regular, participantenan por mehora nan habilidad di visualisacion, desaroya un conexion mas grandi cu nan mente subconsciente, y manifesta cambionan positivo den nan bida.

“Nos mision ta pa inspira crecemento personal, cambionan positivo di mentalidad, y iluminacion spiritual. Compartiendo enseñansanan di visionarionan conoci y incorporando meditacion Estado Alpha, nos meta ta pa guia hende den aprovecha nan potencial interno, realisando nan deseonan, y creando bidanan yen di abundancia, alegria, y plenitud. Un biaha pa luna nos ta organisa un sesion di meditacion Estado Alpha na lama” e fundacion a bisa.

E directiva ta consisti di Presidente sra. Geraldine Laclé, secretaria sra. Tusy Henricus y tesorero sr. Robert Laclé. ‘e Poder den Mi’ ta riba Instagram na unda cu tur dia   ta comparti eMensahe di Dia inspirativo. “Tambe nos tin un canal di Youtube cu videonan educacional y inspirativo. Nos Mensahe di Dia ta wordo manda tur dia pa tur esnan cu ta desea”. Pa cualkier informacion por tuma contacto cu nan na nancoreo electronico: epoderdenmi@gmail.com