Segun encuesta na Corsou, politico mas popular ta Javier Silvania

WILLEMSTAD -  E votadó tin konfiansa den Kòrsou i den  e koalishon aktual? Esaki tabata e pregunta klave pa un enkuesta hasi pa Kenniscentrum Curacao ku ta parti di University òf the Dutch Caribbean (UDC).  E enkuesta ta laga konosé e opinion di e posishon  estatal i polítiko na Kòrsou. I komo primisia EXTRA ta presentá e enkuesta aki na nos lektornan. Nos lo hasi esaki den mas ku un artíkulo pa asina por kubri tur e áreanan enkuesta.

A realisá e estudio entre 737 hende ku a vota na Kòrsou. Den e período di 4 pa 21 di yüni 2023, a puntra kua posishon estatal e votadónan enkuesta tin nan preferensia, kiko nan a vota den elekshonnan anterior i kua partido nan lo vota awor p’e. Ademas, a puntra tambe tokante e konfiansa ku tin den un kantidat di polítiko. E preguntanan tokante posishon estatal tambe a wòrdu formulá na sèptèmber 2020 (tempu di Covid), e resultadonan di e enkuesta aki ta wòrdu kompará ku esei.

E konklushonnan prinsipal for di e estudio ta losiguiente;

Konfiansa den e polítikonan aktual

Aktualmente, ku un 41% mayoria konfiansa ta den Silvania di MFK.

Na di dos lugá ta sigui Larmonie-Cecilia di PNP ku 33%, sigui pa Cijntje (PNP) i van Heydoorn (MFK) ku 27%.

Remarkabel ta ku premier Pisas (MFK) ku 23% ta na di sinku lugá.

E úniko ku no ta minister den e tòp 8 ta Osepa (PNP) na di seis lugá ku 19%.

Cooper ta na di ocho lugá ku 18%, sigui mesora pa di 9 lugá ku mesun skor Camelia Romer.

E promé 8 lugá ta okupá pa miembronan di e koalishon (MFK-PNP).

E dos lidernan di e partidonan mas grandi di oposishon (MAN i PAR) ta skor ku respektivamente 18% (Mc William) i 14% (Girigorie) ku ta reflehá un konfiansa relativamente abou.

Preguntanan mas detayá

Analisando e resultadonan detayá pa kada un di esnan ku a skor mas haltu, nos por menshoná ku serka Silvania esnan ku tin masha poko konfiansa den dje ta 26%, esnan neutral ta 19 % i esnan ku no tin opinion ta na 15%. Un 41% tin hopi konfiansa den dje. Silvania ta esun ku a skor mas haltu di konfiansa ku tin den dje i tambe e skor di mas abou di e votadónan ku tin poko òf no tin konfiansa den dje.

Larmonie Cecilia a skor na di dos lugá ku 33% di votadónan ku hopi konfiansa den dje i 27% poko òf no tin konfiansa den dje; Promé minister di Kòrsou Pisas a Sali na di sinku lugá ku 23% di konfiansa di votadónan i kasi 40% ku no tin konfiansa òf poko konfiansa den dje.

Esun ku e skor mas haltu di poko konfiansa òf no tin konfiansa mes den dje ta Cooper ku 47% miéntras ku Camelia Romer ta sigui ku 42% sigui pa promé minister Pisas ku 39%.

Otro polítikonan ku tambe e votadó a duna su opinion riba dje den e enkuesta di UDC ta losiguiente;

Poko konfiansa òf no tin konfiansa mes ta Rennox Calmes 52%,  Michelangelo Martines 48%,Luigi Faneyte 47% Quincy Girigorie 46%, Giselle Mc William 42%,  Marilyn Moses 39%, Gwendell Mercelina 37%,  Fergino Brownbill 36% i Kenneth Martis 31%.

Di esnan enkuesta mester menshoná ku ku mas hende muhé ku hende hòmber a vota pa e partido di mas grandi MFK. Serka PNP, Par i Man ta nèt hende hòmber ta esnan ku mas a vota. Tambe ta masha remarkabel ku relativamente hopi hende muhé a vota pa netamente e partidonan ku no a logra haña asiento ku ta PIN, UKPK i Vishon.

Pa loke ta edat di e votadónan, mayoria hóben (62%) di 18 pa 24 aña a vota pa MFK, sigui pa 25 pa 34 aña (54%), 35 pa 49 aña (46%), 50 pa 64 aña (35%) i 64 aña bai ariba tabata 28%. Por konkluí ku mayoria di e votadónan di MFK tabata hóben i hóbennan adulto entre 18 i 49 aña i ménos hende riba 50 aña.

Serka PNP niun di e grupo di 18 pa 24 aña a vota pa nan miéntras ku mayoria di e votonan ku  PNP a haña tabata den e grupo di 65 aña bai ariba.

Serka PNP, Par i Man mayoria di nan votadónan ta hendenan di mas edat i ménos hende hóben. NOTA: E texto a keda scirbi den Papiamento fonetico di Corsou.