ELMAR: Lamper awe mainta a causa cu varios area rond di Aruba a keda sin coriente

ORANJESTAD – Debi na efecto di lamper awe mainta durante e awacero torencial, ELMAR a avisa cu nan tabata confrontando problema den distribucion di coriente den diferente area rond di nos isla. E prome cu a haya problema cu coriente tabata Yara y vecindario algo prome cu 8’or. A sigui Jaburibari, Seroe Pita y vecindario, Paraguana, Sombre y vecindario y finalmente Matividiri, Angochi, Cas Ariba, Jamanota y vecindario. ELMAR a sigura cu nan techniconan tabata trahando duro cu diferente ploeg rond di nos isla eherciendo nan trabou cu maximo precaucion pa garantisa seguridad di cada un, pa asina por cuminsa reestablece suministro di coriente mas pronto cu ta posibel.