Mal tempo a pone gobierno cera tur scol na Aruba awe mainta

ORANJESTAD – Debi na e situacion di tempo, gobierno a anuncia diamars mainta tempran cu scolnan na Aruba ta cera. Mes momento Stichting Katholiek Onderwijs Aruba (SKOA) tambe a pone riba nan pagina di Facebook cu scol ta cera awe. E mal tempo ta debi na e efectonan di tormenta tropical Franklin cu ta panort di Aruba bayendo ariba. Asina mes, e ta ranca mal tempo for di suid y trece ariba. For di 5’or di marduga, e tempo a cera di tal forma cu tabata obvio cu e situacion lo por a empeora. Cu un show di strena y lamper, esaki a tene hopi hende lanta y ocupa. Pa 6’or awacero a cuminsa cay basta fuerte y a sigui te cu mainta ainda awa ta cay riba henter Aruba. 

METEO

Meteo a emiti nan unico boletin regular di dia dialuna atardi, unda cu nan ta alerta pa posibel mal tempo pero tabata papia di ‘awacero breve’. A bisa si cu lo por tin strena cu lamper y cu localmente por tabatin awacero modera te fuerte y ‘causa molester’. Pa loke ta e potencial di awacero, a haci mencion di entre 3 pa 7 mm aunke cu localmente esaki por tabata diferente. Por ehempel a nota cu pa airport por a spera te cu 13.6 mm, na Westpunt 10.8mm, y na Sta Rosa 11.2 mm. Pero fuera di e boletin regular, te cu diamars mainta 7:52, no tabatin ningun otro boletin extra di sea Meteo of Rampenbureau riba e tema.