Bermudez: A introduci e norma pa evita cu ambtenaar pensiona cu full pensioen por haya full contracto tambe

ORANJESTAD -  E unico norma cu ex minister di Finanzas Angel Bermudez a introduci tempo cu e tabata minister na juni di 2016, tabata esun cu personanan cu retira cu un pension completo, no por haya un contracto di trabou cu ta ensera cu salario completo. Asina e ex mandatario a reacciona pa NoticiaCla.com riba e informacion cu actual minister di enseñansa Endi Croes a bisa un dia prome. Sr Croes diadomingo a anuncia cu e la ‘aboli’ e asina yama ‘Bermudeznorm’, pa hacie atractivo pa ex docentenan traha bek cu contract pa yena e basio cu tin aworaki den enseñansa. 

E BERMUDEZ NORM

Segun e ex mandatario den su reaccion pa e portal aki, e motibo cu e la introduci e norma di e tempo ey, tabata pasobra tabatin hende trahando den Cocolishi e tempo ey, di 70+ cu tabatin full un pensioen caba, y tabata traha cu un contracto completo riba dje. “Pues mi a bisa, bo por gana, cu contract, te cu 100% incluyendo pensioen”, pues no por a double up e placa manera cu tabata sosode, osea full pensioen y full contract riba dje. Y esaki e la haci solamente pa ambtenaar. “(Otro) docentenan ta wordo paga pa e fundacionan manera SMOA y SKOA”, e mandatario a bisa. Esaki tabata trata solamente pa esnan cu tabata ambtenaar bou di gobierno, osea pa scolnan publico. 

PENSAMENTO DI CROES

E pensamento tras di eliminacion di e Bermudeznorm segun e mandatario actual di enseñansa, tabata pa por a atrae entre 15 pa 20 ex docente cu a baha cu pensioen, pa kita e escases di docente cu tin. Esey ta nifica cu awor aunke cu nan tin pensioen caba, por haya un contracto completo, esta banda di nan salario, cu ta haci e trabou mucho mas atractivo. Segun e mandatario, ministerraad a aproba e cambio aki recientemente. NOTA; E potret di e ex mandatario ta un di archivo di e portal aki y no ta un potret actualisa.