Do Nascimento: ‘Lucha pa Reforma’ lo no traha cu MEP y AVP den un futuro gobierno

ORANJESTAD – Partido politico nobo Lucha pa Reforma di parlamentario independiente Ryçon Santos Do Nascimento no ta dispuesto pa traha cu partidonan MEP y AVP, den un coalicion ora cu tin elecccion atrobe. Esey e la bisa den e programa Noticiacla LIVE recientemente cu moderador Tito Laclé. Segun do Nascimento, e dos partidonan grandi ta un problema y ta imposible pa asocial su mes cu e dos partidonan aki. Ora cu a puntre, mirando e critica constante cu e tin contra e dos partidonan grandi aki, kico ta pasa si despues di eleccion proximo si e haya asiento y tin cu traha hunto cu nan, e la bisa cu e lo no haci esey. Y ta prefera e ora pa bay den oposicion unda cu e por haci un miho trabou contra nan. Tabata durante e programa di Noticiacla LIVE, cu e la anuncia den forma di primicia y sorpresa, cu e la lanta su propio partido politico, y cu e ta bay participa cu e partido ey den un eleccion proximo. E no por a bisa ainda ken e otro miembronan tabata, ni si e otro parlamentario independiente Gerlien Croes, lo forma parti di e partido aki.