Comerciantenan di Venezuela kier pa elimina visa pa Venezolano pa islanan ABC

CARACAS/ORANJESTAD – Comerciantenan Venezolano ta pidi pa elimina visa pa Venezolano pa por aumenta exportacion y turismo. Asina e vice presidente di e Camara di Comercio y Turismo di La Vela di Coro Juan Gotopo a bisa e siman aki den un entrevista cu Union Radio. Segun Gotopo, kier pa elimina e rekisitonan di visa, debi cu tin hopi comerciante chikito, mediano y grandi cu tin cu viaha pa e islanan pa contacto directo cu nan clientenan, pero e tramitacion di visa ta causando inconveniente. “Un par di aña pasa, e islanan ABC a kita e visa pa Colombiano, y algun siman pasa Corsou a dicidi pa elimina visa pa Dominnicanonan” Gotopo a sigui bisa. E la sigui bisa cu e prome trimester di e aña aki, un total di 1525 Venezolano a ingresa na Corsou, mientars cu e luna di juli un total di 508. Nan ta preparando algun mision comercial tanto di Aruba y Corsou pa bishita Venezuela y reuni directamente cu e directiva di Fedecamaras pa atende entre otro riba e tema. Tabata algun luna atras cu e islanan ABC a habri frontera maritime cu Venezuela, y Corsou y Bonaire a habri e frontera aereo tambe. Aruba ainda tin e frontera aereo directo cera, pero a opta pa habri e frontera aereo via Corsou pero solamente pa carga. E frontera maritimo directo cu Venezuela ta habri cu Aruba pero solamente pa carga.