ATA: Entrada di ‘Vacation Rentals’ a aumenta cu 193% den 2023 compara cu 2019

ORANJESTAD - Si compara juli 2023 cu juli 2019 por wak cu e categoria di Vacation Rentals di Aruba (AirBNB) a genera un crecemento den entrada di 193%, segun oficina di turismo di Aruba (ATA). Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. 

COMPARACION 2022-2023

Si compara juli 2023 cu juli 2022 por wak cu e prijs averahe di e acomodacionnan aki a crece cu 10%, for di un prijs averahe di $233 pa anochi na juli 2022 pa un prijs averahe di $257 na juli 2023. Si compara juli 2023 cu juli 2019, por wak cu e prijs averahe di e acomodacionnan aki a crece cu 66.5%, for di un prijs averahe di $158 pa anochi na juli 2019 pa un prijs averahe di $260 na juli 2023. 

Si compara juli 2023 cu juli 2022 por wak cu e ocupacion averahe di e acomodacionnan aki a disminui cu 3.1 punto di porcentahe, for di un averahe di 50.6% na juli 2022 pa un averahe di 48.7% na juli 2023. Si compara juli 2023 cu juli 2019 por wak cu e ocupacion averahe di e acomodacionnan aki a crece cu 8.2 punto di porcentahe, for di un averahe di 44.9% na juli 2019 pa un averahe di 53.1% na juli 2023. 

Den caso di entrada, si compara juli 2023 cu juli 2022 por wak cu e categoria a genera un crecemento den entrada di 30%. Si compara juli 2023 cu juli 2019 por wak cu e categoria a genera un crecemento den entrada di 193%.