Aruba den top 10 pa prijs average di camber mas caro di hotel den Caribe

MIAMI/ ORANJESTAD – Aruba ta e di 7 pais (di total di 14) den Caribe cu e tarifa average di camber di hotel mas caro pa dia (average daily rate). Esaki segun un comparacion di cifra haci pa e compania tourism analytics.com. Ta trata di un comparacion di cifra entre 14 pais den Caribe entre 2022 y 2021. E isla den Caribe cu tin e prijs average mas caro di hotel pa dia ta Turks & Caicos mientras cu esun cu tin e tarifa mas barata average ta Republica Dominicano. 

COMPARACION CU ARUBA

Segun e informacion difundi di e portal den comparacion cu otro destinacionan den Caribe, e tarifa average pa camber pa dia na Aruba tabata $260.01 dollar pa anochi na 2021, mientras cu pa 2022 esaki a subi te na $309.04 pa anochi (segun datos cu e portal a ricibi di AHATA). Un aumento di 18.9%. E isla (pais) den Caribe cu tabatin e tarifa average diario mas halto na 2022 tabata Turks & Caicos cu $1204.17 pa anochi, compara cu $1059.19 pa anochi, un aumento di 13.7%. 

AUMENTO DI MAS DI 100%

Loke sinembargo mas a hala atencion, ta e cambio pa Cayman Islands, unda cu e pais aki a conoce un aumento di 124.3% di aumento di tarifa, di $233.48 na 2021 te $523.59 na 2022. Pues un aumento di hopi mas cu 100% di aumento di prijs. Esun mas barata manera raporta, ta di Republica Dominicana cu na 2021 tabatin e tarifa di $135.12 y a conoce un aumento di 20% te na $162.86. Corsou ta na di 13 lugar, casi mas abou, prome cu Republica Dominicana cu $206.32 average na 2022 compara cu $172.95 na 2021, un aumento di 19.3%. 

OCUPACION AVERAGE DI CAMBER

Mientrastanto e mesun analisis ta pone Aruba na cabez, ora cu ta trata e asina yama Average Room Occupancy, esta e ocupacion average di e camber, cu ta poni na 75% na 2022 compara cu 56.5% na 2021 cu ta un aumento di 18.9%. Aki notable ta cu Corsou ta sigui cu 70.7% na 2022, compara cu 51.6% cu ta un aumento di 19.1%. Di e mesun 14 paisnan, esun cu tabatin e ocupacion mas abou na 2022 tabata Belize cu 43.3.% compara cu 32.1% na 2021. Tambe notable ta Cayman Islands cu na 2021 tabatin apenas 18.7% di ocupacion average na 2021, a conoce e aumento di mas halto di 27.7% cu a pone esaki na 2022 te na 46.4%.