Contratista di Elmar a kap kabel lagando parti di Playa sin coriente

ORANJESTAD – “Nos a confronta un problema cu distribucion, un gran parti di Oranjestad/Playa” tabata palabra di vocero di e compania di distribucion di coriente, NV Elmar Audrey Croes. E problema aki a causa cu varios parti di Playa tabata sin coriente for di merdia. “Nos tecnico ta trahando pa soluciona e problema” Croes a finalisa bisando. Mientrastanto mas informacion acerca a splica cu awe merdia durante trabounan tumando lugar na e Onderstation di ELMAR na Sabana Blanco, un contratista cu ta realocando diferente kabel, a dal riba un kabel cu ta suministra coriente na un gran parti di Oranjestad. E area aki ta consisti di e siguiente areanan: Centro di Playa, Belgiestraat, Madiki, Arendsstraat, Driemasterstraat, Postkantoor y vecindario.  Despues poco poco esaki a cuminsa normalisa. “Suministro di coriente e ser reestebleci den e area di Schelpstraat, Bestuurskantoor, Renaissance Wind Creek. Poco poco lo sigui suministra coriente den e areanan afecta.

MAS FAYO DI CORIENTE 

Ta un hecho cu tin varios rato caba cu Aruba ta pasando door di problema unda cu diamars marduga tabatin problema cu coriente na area di Palm Beach. Awe mainta tabatin varios parti sin coriente atrobe, pero esaki tabata pa mantencion. Y awe tardi merdia coriente a bay na varios area y ainda tabata wardando coriente bin bek.