BCA: Consumidor ta mas pesimista. Prijs halto ta preocupacion grandi!

ORANJESTAD - Consumidor tabata mas pesimista, mirando cu e indice di confiansa di consumidor a cay cu 0,4 punto di índice te na 92,6 den e di segundo trimester di 2023 (Grafiek 1) . Asina Banco Central di Aruba ta relata den un comunicado diabierna. 

Segun BCA,  na final di e di segundo trimester, consumidor tabata principalmente preocupa cu (i) e situacion di negoshinan y di economia lo deteriora (Q2-2023: 61 porciento, Q1-2023: 51 porciento), (ii) tin dificultad pa haña un trabou nobo (Q2-2023:51 porciento, Q1-2023: 44 porciento), y (iii) e posicion financiero di gobierno lo empeora (Q2-2023: 44 porciento, Q1-2023: 43 porciento). Ademas, 39 porciento di tur respondente ta anticipa cu e situacion financiero di hogar lo empeora den e di segundo trimester di 2023, esta 9 punto di porcentahe mas compara cu e trimester anterior (Q1-2023: 30 porciento). Aproximadamente 93 porciento di tur respondente a señala cu nan ta premira cu prijsnan lo ta mas halto den e proximo 6 lunanan (Q1-2023: 91 porciento). 

Tanto e indice di e situacion actual como e indice di expectativa a cay, esta cu 0,9 punto di indice te na 93,0 y 0,7 punto di índice te na 92,7, respectivamente, den e di segundo trimester di 2023. 

E cantidad di respondente cu a raporta cu tuma un hipoteca no tabata adecua a crese te na 68 porciento (Q1-2023: 65 porciento). Pa locual ta haci un prestamo, 69 porciento di respondente a indica cu esaki no tabata oportuno (Q1-2023: 68 porciento). Mientras e respondente cu a señala cu compra di un auto no tabata conveniente, como tambe compra di un aparato grandi no ta adecua, a keda igual na 73 porciento y 56 porciento, respectivamente. Ademas, 56 porciento di respondente a indica cu baymento cu vakantie no tabata factibel, (Q1-2023: 57 porciento). Consecuentemente, e indice di habito di consumidor a crese marginal di 92,5 den e di promer trimester di 2022 te na 92,6 den e di segundo trimester di 2023.

Grafiek 1: Indice di Confiansa di Consumidor

Fuente: Banco Central di Aruba

Informacion adicional riba e encuesta di confiansa di consumidor ta disponibel riba website di CBA (https://www.cbaruba.org/).

Banco Central di Aruba

3 augustus 2023