Duana na aeropuerto di Corsou a detecta pasahero cu cantidad grandi di remedi den su ekipahe

WILLEMSTAD - Bosero di Duana di Kòrsou, Luthsel Lourens, awe ta duna di konosé ku durante di un kontrol intensivo di Duana na aeropuerto algun dia pasa, a detektá un pasahero ku tabatin un kantidat basta supstansial di remedi den su ekipahe nan.

E loke mas a resaltá – ademas di e kantidat – tabata e echo ku e tabatin nan bon skondí den diferente artefakto/empake. Segun Lourens esaki ya kaba tabata sufisiente pa duna un indikashon ku ta trata aki di algu ilegal. E bosero ta splika ku atrabes di tempu ya ta konosí pa Duana ta kual ta e paisnan di rísiko pa loke ta trata importashon ilegal di remedi òf suplemento. “Naturalmente mester tene kuenta ku no ta tur dia/ora por logra hasi kontrol di 100 porshento riba e vuelo nan ku ta rísiko, pues tin diferente faktor ku ta hasi esaki imposibel. Den e kuadro aki Duana ta traha konhunto ku Inspekshon di Salubridat.”E ta splika ku ta importante pa informá nos komunidat ku Duana tin tambe e tarea pa protehá salubridat di nos komunidat. “Pues ta bon pa nos komunidat komprondé ku e kontrolnan na sala di yegada na aeropuerto no ta solamente dirigí riba kobransa di impuesto.”. NOTA: Texto ta scirbi den Papiamento fonetico di Corsou.