Relato di OM riba libertad di expresion ta debi na cosnan menciona den Enfoke cu ta atacha integridad di PG

ORANJESTAD – E relato cu Ministerio Publico a saca diaranson riba e tema di libertad di expression, ta relaciona cu e hecho cu den e programa Enfoke un dia prome, e periodistanan envolvi, (periodistanan Patrick Paskel y Nelson Andrade:red) “ a menciona un cantidad di cosnan cu supuestamente lo a bay of ta bayendo robez den maneho/gobierno y a haci e pregunta den direccion di PG, con esakinan por pasa den bo bista”. Asina e vocero di Ministerio Publico Ann Angela a aclarea riba peticion di e portal aki. “ Esaki ta atacha integridad di un PG. Pesey cu a tuma e decision pa saca un relato den cual a atrobe (a yega di saca un persbericht asina dos aña pasa y e PG a toca e tema aki den su entrevistanan) enfatiza cu libertad di expresion ta un gran derecho y bon, pero e ta wordo limita pa ley penal y civil” Angela a sigui bisa.

KEHO ENTREGA 

Manera e portal aki a raporta anteriormente tambe, diaranson mainta minister di husticia di Aruba Rocco Tjon a entrega un keho penal contra e periodista Patrick Paskel, pasobra a atacha su nomber y credibilidad, debi na cosnan cu e periodista a bisa den e direccion di e minister. E minister no a tuma esaki y a entrega e keho aki pa pone fin na e forma di proceder aki.