Segun DOW, trabounan den Columbusstraat/Wilhelminastraat ta caba te October 2023!

ORANJESTAD – Un proyecto anuncia na fin di 2022 cu mester a revitalisa parti di Oranjestad, y dura ‘apenas’ 50 dia pa wordo entrega, awor ta mustra cu lo dura tres biaha mas hopi tempo pa keda cla esta 150 dia. Despues cu minister encarga Geoffrey Wever a anuncia siman pasa ainda cu lo dura 8 siman pa e keda cla, awe DOW a anuncia cu lo dura aun mas largo y cu ta te na October di e aña aki, e lo keda entrega. Tur pasobra no a ‘anticipa’ cierto problemanan subteraneo, cu a gara DOW di sorpresa, ‘atrobe’. No ta prome biaha cu proyectonan ta cuminsa pa despues bin haya sorpresa desagradabel cu ta tarda e proyecto mas cu mester. 

E UPDATE E SIMAN AKI

DOW diamars riba nan pagina di Facebook a informa kico ta kico realmente. Segun e splicacion, e siman cu a caba di pasa a hiba materiaalnan na e sitio pa e trabounan por sigui cana. Mayan, esta diaranson e contratista ta bay cuminsa cu e trabounan di RWA den Columbustraat. Nan lo bay coba den caminda, pone tubonan y e cera e bakprofiel bieuw. Esaki lo bay tin un duracion di 5 siman.

KLINKERS

Ora finalisa cu e trabou di e bakprofiel bieuw lo bay cuminsa cu trabounan di pone klinkers riba e caminda.  Den e prome siman di September, lo cuminsa cu trabounan di RWA den Wilhelminastraat sigui pa trabounan di klinkers. Esey kiermen cu un parti di Wilhelimastraat lo wordo cera.

KEDA CLA NA OCTOBER

Esaki ta e planning cu contratista a duna DOW y ta premira cu e prome siman di October e proyecto por keda cla si no haya ningun contratiempo mas.