Na Corsou un grupo mafioso Mericano a “chica” hopi placa di Girobank

WILLEMSTAD - E grupo di supuesto invershonista ku dado momentu a bira akshonista den Girobank a kue tur hende den e banko aki kabes abou. Primeramente e grupo no a hinka niun depchi den Girobank. E último aki mes a paga pa su akshonnan, i finalmente el a bati retirada ku basta mion den su saku. Esaki a pone ku dado momentu Banko Sentral a entregá keho kontra e miembronan dje hunta di direktiva di Girobank. EXTRA a komprondé asta ku un di nan a keda detené na Merka den un kaso di malversashon. T’asina ku e siman aki EXTRA a risibí kopia dje rapòrt ku Deloitte a traha riba Girobank, i den un di e kapítulonan aki Deloitte a dediká atenshon na e entrada dje grupo Merikano “IIG” i tambe CEO Girobank komo akshonistanan den e banko.

E rapòrt ta bisa ku na 2010 a yega un akshonista mayoritario nobo, ku tabata e grupo di invershonista Merikano IIG, pa medio di su partisipashon den IIG Trade Opportunities Fund NV i su kompania filial IIG TOF Holding NV. Den esaki IIG tabata ser representá dor di Managing Partner IIG-1 i Managing Partner IIG-2. E partido aki a optené e akshonnan ku e momentu ei Total Bank (grupo Venezolano) tabatin den Girobank.

E akshonistanan eksistente dje momentu ei (gobièrnu di Kòrsou i Fondo di Penshun APC) tabatin un ròl minoritario. IIG e momentu ei tabatin 58.1% dje akshonnan, APC i Pais Kòrsou huntu tabatin 41.9%.E tempu ei Banko Sentral den su proseso di ‘screening’ di IIG komo akshonista nobo a pidi diferente kos i tambe a pidi e grupo pa duna un splikashon pa loke ta su interes komo entidat di invershon i komo akshonista di banko. Komo un dje bentahanan IIG a menshoná ku e tim di maneho d Girobank lo ser fortifiká, lo bai tin un ampliashon dje pakete di produktonan ku Girobank tin di ofresé (Trade Finance) i ekseso pa e merkado Latino-Amerikano. Mas aleu Banko Sentral a pone su kondishonnan manera e.o. sierto garantianan, i asina na aprel 2010 Banko Sentral a duna su aprobashon por eskrito pa entrada di IIG komo un dje akshonistanan di GiroBank.

Pero na novèmber 2010 ta bin resultá ku Total Bank a bende tur su akshonnan ku CEO Girobank, ku na su turno a bende esakinan ku IIG. Den ámbos akuerdo e suma tabata di $80 mion. Pero Banko Sentral a haña ku legalmente no a violá ningun regla. For di investigashonnan mas aleu dor di Banko Sentral algun aña despues ta bin resultá ku e fondonan di e transakshon aki parsialmente a Sali di Girobank mes. Den esaki tabatin diferente kuenta bankario ku nan a mishi kuné mediante un supuesto “loan carousel”.

Pero e konsekuensia di esaki tabata ku tin kuentanan di hopi kliente a keda ku buraku (na rason di $19.1 mion). Tambe CEO Girobank a ekstraé plaka di diferente banko Venezolano ku tabata den bankarota òf bou di kuratela. Por sierto, CEO a keda apuntá dor di Banko Sentral komo kurator. E loke a ser ekstraé tabata na rason di $24.3 mion pa kumpli ku e preis di kompra dje akshonnan en Girobank. Den e kuadro aki Girobank a entregá denunsia na 2015 i 2020 kontra e èks miembronan di e hunta di direktiva di Girobank.

Den e periodo ei tabatin pago di dividendo na rason di Nafl. 20 mion dor di Girobank. Segun e rapòrt di Deloitte, finalmente e finansiamentu dje $80 mion pe akshonnan a bini di e $19.1 mion + $24.3 mion + Nafl. 11.6 mion, ku no tabata di IIG, sino for di Girobank i diferente banko Venezolano unda CEO a ser apuntá komo kurator. NOTA: E texto ta scirbi den Papiamento fonetico di Corsou.