Ta evaluando paso legal contra portal fraudulento di ED Card di Aruba

ORANJESTAD – Instancianan di turismo di Aruba ta evaluando pasonan legal pa atende cu e portalnan fraudulento relaciona cu e ED Card pa Aruba. Tanto ATA como AHATA a confirma cu nan ta na altura di e portalnan fraudulento tambe obviamente. “Nos ta evaluando posibilidadnan legal pa baha e avisonan di e portalnan fraudulento” un mensahe dirigi na e mundo turistico di Aruba ta bisa. E mensahe tambe ta trahando duro pa fortifica e informacion riba e portal corecto pa e ED Car, pa medio di e canalnan conoci. Despues cu e noticia a keda saca un dia prome di e portal fraudulento, e instancianan di turismo ta haciendo tur lo posibel pa mitiga e problema y evita cu e por bira un problema pa turistanan cu tin cu bishita Aruba proximamente. No ta conoci si tabatin kehonan caba di turistanan cu a ‘cay’ den e trampa aki, y cu a ‘paga’ pa e ED Card, mientras cu esaki ta completamente gratis. 

E CASO 

Manera cu noticiacla a raporta diaranson, departamento di imigracion a bati alarma diaranson merdia pa un caso di acto fraudulento relaciona cu e website riba cual mester yena e asina yama ED Card pa biaha pa biaha pa Aruba. “Inmigracion Aruba (IA), kier alerta y proteha bo contra un website falso cu ta circulando actualmente riba internet. Por fabor, tene bon cuenta pa asina evita posibel engaño y/of perdida di informacion personal” e mensahe ta bisa. 

COBRA

Segun e hefe di imigracion a informa e portal aki, aparentemente e website falso aki ta cobrando pa Aruba su Online ED Card. “ E website aki no ta pertenece ni ta relaciona na e Online ED Card di Inmigracion Aruba (IA)” e mensahe ta bisa. A manda bisa mesora tambe cua ta e website falso.  E website falso ta: https://www.embarkation-aruba.com/, mientras cu e website corecto ta https://edcardaruba.aw/.  E problema ta cu hendenan cu a traha e website falso kier cobra e persona cu ta biahando siendo cu no tin ningun gasto envolvi pa yena e carchi. “Inmigracion Aruba (IA) kier recorda tur persona cu e Online ED Card di Aruba ta completamente GRATIS, pues free of charge!” e mensahe di e hefe di imigracion a finalisa bisando.