DUBLIN – E cantante Irlandes Sinéad O'Connor, conoci pa su aparencia unico di ta cabez feita y of pelon, a fayece diaranson na edad di 56 aña. Den añanan 90 e la logra fama mundial cu su cancion ‘Nothin’ Compares To You’. Su famia a haci e anuncio riba e medio Irlandes RTE cu e la fayece. E cantante y compositor a produci 10 album, entre nan esun cu tin e version di e cancion ya conoci. Na Hulanda e cancion ey tabata 8 siman number uno di e top 40 di Hulanda.
DUBAI – E portal Hulandes Het Parool ta raporta diabierna cu e futbolista Quincy Promes a recobra su libertad bou di condicionan special. E futbolista, condena pa traficacion di droga, por warda e proceso di extradicion pa Hulanda, den libertad eynan.
BRASILIA – E Copa Mundial di futbol damas ta tuma lugar aki tres aña na Brazil. Durante e congreso di FIFA na Bangkok, nan a gana e oferta pa organisa e evento mundial aki. Hulanda, Belgica y Alemania hunto tambe tabata den contienda hunto pa organisa e weganan, pero no a logra gana esaki.
CHICAGO – Un ciudadano Mericano cu antes a considera Aruba mucho caro pa bay cu vacacion, awor ta bay pasobra e la caba gana 1 miyon dollars den un loteria di raspa. Ta trata di e homber di Fairvievw Kevin Weaver. “Mi a raspa e ticket den mi truck den un parkinglot y mi tabata den shock completo ora cu mi a wak cu mi a gana un miyon di dollar” Weaver a bisa.
HANDLOVA – E situacion di e premier Slovaco Robert Fico )59) ta sigui critico, despues cu awe mainta e la keda alcansa durante un caso di atentado riba su bida. E tabata na un evento publico ora cu un persona a los por lo menos 5 tiro riba dje. E premier a keda transporta cu urgencia pa hospital y tabata ainda den sala di operacion y tabata teme pa su bida. E supuesto tirador a keda deteni despues di e atentado, pa un grupo di persona den cercania.
CARACAS - Guyana ta sigura cu ehercicio haciu cu Merca ta parti di e ‘pacto di cooperacion den materia di defensa’ cu e tin cu Merca. Mientrastanto minister di defensa di Venezuela Vladimir Padrino López, a rechasa e buelo di dos avion Mericano riba Guyana y ta considera esaki como un provocacion di e commando sur di Merca. “Forza Arma Nacional Bolivariana ta rechasa contundentemente e provocacionan reitera, auspicial pa gobierno di Guyana, cu a asumi e rol di un colonia nobo Norte Americano” Padrino Lopez a bisa.
JERUSALEM – Premier di Israel, Benjamin Netanyahu a bisa cu Israel lo sigui e guera contra Hamas, sin sosten di Merca, si ta necesario. E ta reacciona asina riba e decision di Merca pa por lo pronto no manda municion di atake pa Israel. Presidente Mericano Biden a bisa diahuebs cu Merca ta stop cu entrega di arma cu por wordo usa pa ataca Rafah.