ATA: JetBlue ta añadi tres buelo diario pa Aruba for di Merca

ORANJESTAD/NEW YORK – E aeroliña Mericano jetBlue a confirma cu e ta pone 3 buelo adicional pa Aruba den December proximo. Esaki ta traduci na 63.000 stoel adicional. Tabata dialuna ultimo, cu oficina di turismo di Aruba, (A.T.A.) a reuni cu jetBlue Airways pa reforsa e bon colaboracion y conexion cu e aerolinea. JetBlue ta un socio di suma importancia pa Aruba, como e di dos aerolinea lider den capacidad di asiento y e aerolinea number un den transporte di turista pa Aruba, si considera resultado di promer mitar di 2023. JetBlue a trece un total di 140,808 bishitante pa nos isla den e periodo aki. 

TRES AEROPUERTO CLAVE

JetBlue ta opera vuelonan for di 3 aeropuerto clave, esta JFK, Newark y Logan Airport na Boston. Biaheronan por goza di vuelonan cu e A321Neo cu ta entre otro ofrece e servicio premium di ‘Mint’ riba e vuelonan pa Aruba. 

Segun ATA, pa duna un ilustracion di e importancia di JetBlue, por bisa cu den luna di juli e aerolinea ta ofrece un total di 37 vuelo semanal cu ta inclui 14 di Boston, 22 di JFK y 1 di Newark. 

Durante e reunion cu ATA a considera como productivo, a discuti strategianan pa sigui mantene e bon cooperacion cu a contribui na haci Aruba un destino sobresaliente den e portfolio completo di JetBlue. A indica cu demanda ta sigui ta sobresaliento compara cu otro destinacionnan. 

Durante e reunion, tambe a discuti e oportunidadnan pa traha riba puntonan pa futuro, planes pa sigui aumenta e fluho di pasahero pa Aruba y a combersa di maneranan pa mehora e experencia di biahe pa bishitantenan. 

Asina por bisa cu pa e temporada halto, esta ‘winter’ 2023-2024, ta proyecta cu capasidad di asiento lo crece di 6 vuelo diario pa 9 diario. Detayes mester wordo confirma, pero e hecho aki ta re-afirma e compromiso di jetBlue cu Aruba. Tambe a confirma cu durante e mesun periodo lo opera vuelonan cu e servicio premium ‘Mint’ for di e mercado di JFK. 

Aruba ta di suma importancia pa jetBlue tambe. Si tira un bista por ehempel riba juli 2023, Aruba ta e di 5 destinacion cu mas asiento aereo di jetBlue den Caribe (fuente: DIIO). E importancia a ser confirma tambe ora confirma cu Aruba ta sigui ta un top destino pa nan den e region di Caribe y Latino America. 

A.T.A. y AAA ta mira e importancia di mantene bon comunicacion y cooperacion constante cu socionan den e industria di turismo. Banda di JetBlue, ta reuni regularmente cu otro aerolineanan importante pa nos isla, manera American Airlines, Delta Airlines y United Airlines, cualnan ta forma parti di e top 5 aerolineanan for di e mercado di Merca.

Tanto A.T.A. como tambe AAA y JetBlue ta entusiasma pa sigui traha hunto pa desaroya e industria di turismo di Aruba, promoviendo crecemento economico pa nos isla.