Venezuela ta pinta Aruba y Corsou malo, cu raport Mericano riba exploitacion di migrantenan Venezolano

WASHINGTON  – Prensa Venezuela e siman aki a duna atencion na e reportahe cu Departamento di Estado Mericano a emiti algun tempo pasa riba exploitacion laboral y sexual di migrante Venezolano na Aruba y Corsou, pintando Aruba y Corsou como paisnan cu ta trata Venezolanonan malo riba e tema menciona. E portal Venezolano LA PATILLA ta raporta e siman aki riba e tema. E portal ta referi na e informacion anual riba traficacion di persona cu a sali algun tempo atras caba y cu Aruba a relata ariba tambe, cual rapport a keda entrega pa e secretario di estado Mericano Anthony Blinken. Segun e rapport cu e medio Venezolano awor ta raporta ariba,  Venezolanonan ta esnan mas afecta pa e operacion aki loke ta sosode den un contexto di emergencia humantaria compleho den su pais di origen. Aruba recientemente pa medio di e departamento cu ta atende cu traficacion di hende a menciona cu Aruba a haya un rapport basta bon, cu ta TIER 2, y ta bisa mes momento cu nan a haci algun esfuerso pa mehora e problema, pero cu nan ta insuficiente ya cu nan no a condena ningun di e personanan aki pa e delitonan. Ademas, segun e raportahe, e autoridad Arubano lo no a identifica niungun victima Venezolano den 2022, cu ta genera preocupacion relaciona e identificacion di e victimanan potencial. Corsou tambe a haya un mencion unda cu e raport ta menciona cu e pais aki no a reuni e standard minimo pa atende cu e asunto aki di traficacion di hende, ya cu e corte no a condena ningun traficante y e gobiernbo a condiciona e existencia di e victimanan stranhero na e cooperacion cu e cuerponan di aplicacion di e ley.