Huez federal a pone fecha pa otro aña pa husga ex presidente Trump den caso criminal

FORT PIERCE – Ex presidente Mericano Donald Trump lo mester presenta dilanti mesa ‘berde’ na Merca otro aña na mei pa un caso criminal di malusa documentonan confidencial di gobierno Mericano. E caso ta poni pa 20 di mei 2024. E caso mester a cuminsa e aña aki, pero a hala esaki mas atras. Asina mes e ta un sla pa e ekipo legal di Trump, cu a pidi pa e caso tuma lugar despues di eleccion cu ta fin di otro aña, pasobra e mes ta candidato presidencial atrobe. 

CARGONAN

Trump ta acusa di 37 cargo alega na hecho cu e la intencionalmente manipula cu documentonan confidencial, obstrui husticia y haci declaracion falso. Trump mester a entrega su mes algun tempo atras y a declara su mes inocente. No tabata necesario pa detene biaha pasa y e ta liber pendiente e caso otro aña. Ta prome biaha un ex presidente Mericano ta haya su mes den un situacion asina. Logico cu e ex mandatario ta alega cu ta persecusion politico y cu nan kier stroba su candidatura pa bira presidente un biaha mas.