Arends: Tur proyecto cu tin impacto riba naturalesa mester di un ontheffing!

ORANJESTAD – Minister encarga cu naturalesa, sr Ursell Arends ta considera e caso cu Aruba Bird Life Conservation (ABC) a entama contra Natura Development NV, compania desaroyador di Embassy Suites Hotel, como un ‘case study’, esta un caso di estudio cu mester siña nos hopi cos. Ademas segun e mandatario, e caso aki ta subraya cu nos isla ta un estado di derecho y caminda cu tin ley cu ta conta pa tur hende, y specificamente e la enfoca riba e abogadonan y e compania cu nan ta representa den e caso aki, argumentando cu nan no ta para riba ley.  Y esey e mandatario ta considera e parti principal di e veredicto di ayera cu Noticiacla a publica tambe. “Na Aruba tin regla y procedura y esey ta conta pa tur hende” e mandatario a sigui bisa. Mas aun cu ley ta sirbi pa proteha naturalesa y den e caso aki, a pidi pa corda e letternan NBV, esta Natuur Beschermings Verordening cu ta loke a prevalece. Esaki kier men cu tur proyecto cu tin impacto riba naturalesa, mester di un ontheffing.

NATURA A NENGA DI PIDI ONTHEFFING

Segun e minister diahuebs mainta, Natura Development NV a nenga di pidi un ontheffing, mientras cu huez a bisa cu si mester di un ontheffing. “Natura a insisti cu ley di ontheffing no ta conta pa nan, huez a bisa cu si e ley di ontheffing ta conta pa nan tambe” e mandatario a sigui bisa. 

AANLEGVERGUNNING TA CONDICIONAL

E mandatario a recorda Natura tambe cu un aanlegvergunning osea un permiso di construccion ta condicional. Esaki ta nifica segun e minister, cu sin un ontheffing, e permiso di construccion no ta valido. E minister a splica tambe cu durante e reunion cu e la tene cu Natura, Natura a indica cu nan lo pidi ontheffing solamente si gobierno e minister di naturalesa, garantisa cu e ontheffing ta wordo aproba. “Esaki no tabata aceptabel y mi a rechasa esaki” e mandatario a sigui bisa. 

MENASA DI NATURA CU CASO DAÑO Y PERHUICIO

Den e reunion ey tambe , y emailnan despues, e minister a sigui bisa, cu Natura a cuminsa menasa cu un caso di daño y perhuicio contra Gobierno di Aruba. “Ami como minister di naturalesa no a acepta esaki, y den e veredicto, huez tambe ta acepta esaki” e mandatario a sigui bisa.

PERDIDA PA NATURA TA DEBI NA CONSEHO ROBEZ

E mandatario a sigui bisa tambe cu si tin cualkier perdida di plca a consecuencia di e situacion actual, e no ta culpa di minister ni gobierno, sino di e consehonan ekiboca cu e la haya di e conseheronan legal. “Den reunion cu mi tambe, a propone solucionan pero Natura a rechasa esaki rotundamente, y a escohe e ruta pa Corte, y pa publicidad” e mandatario a sigui bisa. Segun e, e pregunta critico den e caso aki ta, pakico Natura  ta pensa pakico nan si por para riba ley. “Y ken a crea e impression cerca Natura, cu nos por fix cos pa Natura” e mandatario a sigui bisa. Durante e ultimo 3 siman, pa medio di su representantenan, a hiba un campaña publico pa ataca e integridad di e minister, segun e mes a bisa. Tambe a publica un lista di noticianan falso, esta fake news den prensa, y a tuma e momento pa coregi (segun e mandatario) tur esaki. Por scucha e parti di e fake newsnan cu e mandatario a papia di dje, AKI.