Arends: Apenas diamars ultimo Natura Development a pidi ontheffing pa traha nan beach

ORANJESTAD – Apenas diamars atardi ultimo, Natura Development NV, e compania cu ta maneha e hotel Embassy Suites na Aruba, a entrega e documentacion necesario na e departamento concerni pa nan bin na remarke pa un asina jama ‘ontheffing’ pa nan por sigui traha riba e beach ‘traha’. Asina e minister encarga cu e cartera cu ta atende cu esey, Ursell Arends a contesta Noticiacla diahuebs mainta, para riba e lugar cu ta den discusion dilanti Embassy Suites. “Esaki a wordo pasa over na e departamento di naturalesa (DNM). Nan ta esun cu ta bay traha riba esaki y asina ki bin cu un advies pa ami como minister di naturalesa pa asinaki ami por contesta e abogado (di Natura Development:red) . 

TEMPO PA TRATAMENTO

E mal ambiente cu tin entre e minister y e compania (e minister a lesa un lista di cosnan supuesto ‘falso’ cu e compania a publica hunto cu cierto medionan segun e minister:red) no necesariamente lo pisa contra nan, ora cu e minister tin cu tuma su decision. Por lo menos segun e minister su contesta. “E no lo pisa. Mi ta ricibi adviesnan di mi departamento y mi ta keda un hende consecuente. Si bo tin derecho pa haci esaki, pa crea e beach y bo tin tur e forma pa atende cu esaki, nos lo considera esaki” e mandatario a sigura e portal aki. 

CONTRA PROYECTO?

E mandatario ta conciente cu e compania a declara cu e lo ta contra e proyecto y lastra tur cos den e ultimo 3 simanan. Esaki siendo cu na April ultimo, e minister a tene un conferencia grandi di naturalesa den netamente un sala den Embassy Suites cu varios experto di naturalesa unda cu a incorpora derecho di naturalesa den nos constitucion. “Esey ta algo cu mi no ta compronde” e mandatario a sigui bisa. “Ami ta keda midi cu un solo midi. No ta pasobra nan a lastrami den prensa, esey kier men cu ami ta bay perhudica nan. Nan tin un caminda legal cu nan tin cu cana, y aworaki huez a bisa nan cu bo tin cu cana y pidi un ontheffing” e mandatario a sigui bisa. E mandatario a subraya tambe cu ta e conseheronan legal (e abogadonan di e compania:red) ta esnan cu a faya aki y duna conseho robez unda cu entre otro a sigura e compania cu nan no mester di un ontheffing”.