Hugo ‘El Pollo’ Carvajal a declara su mes inocente den corte na Merca

NEW YORK  - Ex director di inteligencia militar Venezolano Hugo ‘El Pollo’ Carvajal a declara su mes inocente di cargo di traficacion di droga na Merca diahuebs, un dia despues di a yega Merca for di Spaña. Merca tabata purbando pa 10 aña caba pa trece riba teritorio Mericano. E prome intento tabata cu ayudo di Aruba na 2014, unda cu a logra pero cu Hulanda a dicidi di lag’e bay basa riba base diplomatico. 

YEGADA MERCA

Carvajal a yega Merca diaranson despues di a keda extradita for di Spaña. E la haci su declaracion di Inocencia un dia despues dilanti huez Stewart Aaron den e corte federal di Manhattan. A ordena pa encarcele mesora y a fiha e siguiente fecha di corte pa dia 25 di juli esta otro siman. E abogado  Zachary Margulis-Ohnuma,a bisa cu e lo haci un peticion pa su cliente sali liber riba fiansa y a sigura cu su cliente ta categoricamente inocente. “General Carvajal ta spera pa presenta su mes dilanti un hurado imparcial y bringa e cargonan ridiculo den corte” e abogado a sigui bisa. Fiscal federal a declara cu Carvajal pa mas di un decada desde 2006 a yega coordina traficacion di 5600 kilo di cocaina di Mexico pa Venezuela. E droga tabata finalmente destina pa Merca segun e fiscal. Carvajal tabata parti di e golpi di estado fracasa na 1992 cu a duna Hugo Chavez e atencion internacional prominente inicial y despues a consider’e como un di e personanan mas poderoso durante e mando di Chavez entre 1999-2013. Prensa internacional ta pone Aruba den cada raportahe di Carvajal refiriendo na e aresto di dje na 2014.