Corte a dicidi: Embassy Suites no por construi nan beach sin un ‘ontheffing’

ORANJESTAD – Corte diaranson a prohibi e compania Natura Development di continua cu cualkier trabou di traha riba e beach dilanti e hotel, sin un dispensacion (ontheffing) conforme articulo 8 pa kita yerba di cañao di e sitio en cuestion. Y si e compania no cumpli, e ta haya un multa di 1 miyon florin pa dia, te un maximo di 25 miyon. Asina corte a dicta diaranson, dos siman prome cu inicialmente a programa pa dicta un sentencia. Esey kier men cu huez tabatin mester di menos tempo pa delibera riba e caso aki. Como tal, e trabou no por continua te ora cu tin claridad riba e ontheffing, y cu si gobierno lo otorga esaki. 

E CASO

E caso a keda trata dia 7 di juli ultimo unda cu Aruba Birdlife Conservation (ABC) a entama e caso sumario contra doñonan di Embassy Suites, esta Natura Development NV. Nan tabata kier pa e compania para e forma cu ta traha e beach dilanti e hotel, debi cu tabata causa destruccion na e yerba cu ta bou di proteccion, mientras cu un caso di profundidad no dicta otro y a pidi pa un multa pa cada dia of parti di dia cu no cumpli, di mei miyon florin cu a keda aumenta despues na 1 miyon florin te un maximo di 25 miyon florin. Natura a bringa esaki y a rechasa e ponencia y a pidi pa laga ABC cubri gastonan di e caso aki tambe. Por lesa e sentencia completo AKI