Pareha latino haya morto ta mustra caso pasional di asesinato y suicidio

ORANJESTAD – Aruba a lanta diaranson cu dos persona latino morto, di cual polis ta sospecha un caso di asesinato y suicidio. E prome persona, e homber Venezolano Jose Miguel Garcia Moreno (35) a wordo hay abanda di un auto na altura di e ruina di e mina di oro na Bushiribana. E auto no tabata registra na nomber di e victima masculino haya, sino di un persona femenino. Autoridad a dirigi na e adres di e persona na ken e auto tabata registra, na Washinton 151, unda cu a bin haya e doño di e auto den e cas, cu no tabata duna señal di bida. Ta trata di Leila Gregoria Contreras Romero (49) cu segun vocero policial suplente Liliana Rasmijn den un decalracion na prensa local, ta mustra di ta e pareha di e homber cu a wordo haya morto anteriormente. Mientras cu investigacion ta continua, ta mustra cu ta trata di un caso di asesinato y suicidio y e investigacion mester determina ken a haci kico exactamente. E prome impression ta cu e homber lo mester a mata e muher, y despues kita su propio bida, pero esey ta speculacion y e por ta otro tambe. Sigur si analisa e mensahe cu e dama a laga mas di 12 ora prome riba su pagina di Facebook, cu por wordo interpreta como un mensahe final di e dama di despedida of un mensahe di reconciliacion pero cu despues cos a bay malo toch. Pa loke ta e mensahe, esaki tabata na spaño gepost mas di 12 ora prome, dirigi na e relacion cu e tabatin cu e homber cu a wordo haya morto “ Mi sa cu Jose Miguel y ami tabatin nos historia hopi dificil, hopi amoroso, pero nos a yega di stima. Aunque cu tabatin diferencianan, e tabata pami mi enseñansa, di loke ami mester a cambia den mi, y e mester a cambia. E importante ta cu nos ta almanan cu tabata mester di otro” e mensahe a bisa traduci na papiamento. E mensaje original tabata bisa ‘Se que jose miguel y yo tuvimos  nuestra historia muy dificil muy amorosa pero nos llegamos a amar a pesar de las diferencias el fue para mi mi ensenansa de lo que  tuve que cambiar en mi y el tuvo que cambiar… lo importante es que somos almas que necesitabamos el uno del otro’. Polis mientrastanto a duna informacion menciona ariba (di nomber y e prome datonan) pero ainda no por confirma exactamente ken a haci kico y mas importante, pakico y ki ora.