Van Huffelen a urgi Tweede Kamer pa aproba renegosacion di debe di Aruba liher

DEN HAAG – Secretario di estado Hulandes pa Relacionan den Reino Alexandra van Huffelen e siman aki a urgi Tweede Kamer -pa trata e asunto di renegosacion di e fiansa di Corona pa Aruba (y Corsou y St Maarten) mas liher cu ta posibel. Esaki mester bay hunto cu un nota di cambio di presupuesto. Sin e cambionan aki, Aruba no por haya e refinanciamento, y mirando cu e fecha di vencemento di e debe ta yegando na October, tin pura pa tur cos keda cla. Hulanda a pone e fecha di 10 di October 2023 como fecha riba cual Aruba tin cu paga e debe bek. Mientrastanto ta conoci cu Aruba no por paga esaki bek y como tal a ofrece pa un refinanciamento di e suma completo di casi un biyon florin. 

E CARTA 

Den e carta cu Noticiacla tin den su poder, e mandatario ta splica tambe e.o. cu pa Aruba haya e refinanciamento cu interes hopi abou, (2 a 3%:red) ta conta cu mester tin un ley di Reino aproba cu ta concretisa e supervision financiero den dje. “Mi a bisa den e combersacion cu Aruba, cu solamente un Rijkswet ta acceptable, pasobra esaki ta e unico instrument cu no por wordo cambia unilateral” e mandatario a bisa Tweede Kamer den su carta. E problema ta cu Hulanda no ta confia Aruba despues cu esaki a cambia e LAFt unilateralmente den Parlamento algun aña pasa. Van Huffelen a informa Tweede Kamer e siman aki atrobe cu gobierno di Aruba a informe cu no tin consensus ainda pa e ley di Reino y cu ‘ta reuniendo ainda riba dje’. “En caso cu no logra yega na un acuerdo cu e tres paisnan riba e condicionan pa cada pais, e ora e oferta di un refinanciamento riba termino largo cu interes abou, ta cay afo” e mandatario a sigui bisa den su carta. “Mi a bisa den e combersacionan cu mester bin un acuerdo liher pa cu e condicionan pasobra e prestamonan ta caduca riba 10 di October 2023, y despues di un acuerdo cu e islanan riba e refinanciamento,  Staten-General mester aproba esaki ainda cu e nota di cambio adhunto, manera cu mi a manda aworaki” e mandatario a sigui informa Tweede Kamer. Si Aruba no aproba, e lo por haya un refinanciamento otro caminda pero cu un interes di por lo menos 6 pa 8% cu ta nifica centenares di miyones extra cu Aruba mester paga bek, cu ta placa cu e por a usa pa inverti. E mandatario a suplica na Tweede Kamer pa un tratamento liher, unabez cu e manda e nota di cambio, net despues di reces. Pa e nota di cambio, e mester haya un luz berde pa evita cu su mes gobierno ta bay viola su propio reglanan presupuestario.