Na Corsou a detene un homber y muher mas, relaciona cu asesinato di Boechi

WILLEMSTAD - E team  di polis Divishon di Crimen Organisa konhuntamente ku e Tim di RST a hasi dos detenshon mas relashona ku e kaso di asesinato ku a haña e nòmber Hummer.

Ta trata di e hòmber sospechoso D.M.G. di 44 aña i un muhé sospechoso J.C.R. di 38 aña di edat ámbos nase na Kòrsou.

Nan ta keda sospechá di tin vínkulo ku e kaso aki. Riba òrdu di Fiskal di Ministerio Públiko, a tene un entrada hudisial na un adrès den Kaya Aura Winkel kaminda polis a haña i konfiská un arma di kandela i un  kashi di bala ku bala ku posiblemente por ta e arma ku a uza durante e asesinato.

Banda di esaki polis a konfiská artíkulonan ku ta di importansia pa e investigashon.

Hummer ta nòmber di e kaso di asesinato ku a tuma lugá den e anochi di 9 di desèmber 2022 na altura di un trùk di pan na Rooseveltweg kaminda a likidá e konosido rèper Ruchendell Windster alias Boechi di un forma kruel ku arma di kandela.

Despues di un investigashon basta largu outoridatnan a hasi detenshon di e promé sospechoso C. Coffie (44) i despues e otro sospechoso C. Zimmerman(24). Tur dos a keda enkarselá na Boneiru pa nan seguridat. Dia 30 di yüni último e kaso a keda trata proforma den sala di korte di promé instansia. Ministerio Públiko a akusá ámbos sospechoso di a likidá Boechi intenshonalmente dia 9 di desèmber 2022. Banda di esaki ta akusá nan pa poseshon di arma.

E kaso a keda trata proforma pa motibu ku ainda falta un ròndu di interogashon pa Zimmerman i e rapòrtnan di DNA di Coffie i Zimmerman mester keda manda NFI Hulanda.

Tambe mester agregá e kantidat di imágennan di kámara den e dosié .

Durante tratamentu di e kaso, Zimmerman a hasi petishon pa e keda enkarselá na Kòrsou kual fiskal a bai di akuerdo kune.

Na final di e tratamentu, Coffie a splika ku  no tabata su intenshon di hasi niun hende daño e dia ei i si e tabata sa ku ta bai tin tiramentu, lo e no a bai buska niun hende, indikando ku ta Zimmerman a los e tirunan mortal riba Boechi.  Segun Coffie e intenshon di Zimmerman tabata pa kita Boechi su kadena.

Zimmerman na su turno a duna di konosé  ku Coffie ta papia masha bunita pero e  tin ku bisa kiko realmente a sosodé, paso e sa esei bon bon i sa tambe ta ken ta e berdadero kulpabelnan i e ta dispuesto pa papia e bèrdat.

E kaso a keda posponé pa dia 27 di òktober binidero pa warda tur e rapòrtnan bin bèk fo’i NFI, miéntras Coffie si a keda trasladá bèk pa Boneiru.