Na Hulanda Andre Bosman a retira su candidatura pa bira lider di partido VVD

DEN HAAG – E conocido ex politico Hulandes André Bosman a retira su candidatura pa bira lider di partido VVD. Den un mensahe largo riba su cuenta di Linkedin, e ta splica cu e ta prefera sostene e candidatura di e candidato di directiva di partido, esta Dilan Yesilgöz y ta yame un liberal fuerte cu e curazon riba e bon lugar. Cu esaki, minister demisionario Yesilgöz ta e unico candidato pa sigui Mark Rutte como lider, y pa Bosman, esey tabata suficiente. Segun e no ta den interes di e partido VVD y Yesilgöz pa tene un eleccion pa liderazgo di e partido. Den teoria, candidatonan tin te mitar di augustus pa postula nan mes pa candidato, pues ainda tin posibilidad toch pa tin un eleccion pa lider. Siman pasa algun prominente di partido a bisa caba di no ta dispuesto pa sigui Rutte. Entre nan Edith Schippers, Klaas Dijkhoff y Sophie Hermans.