Fundacion Muchila Creativo a tene su Openhouse

ORANJESTAD - Fundacion Muchila Creativo tawata tin recientemente, 8 di juli 2023, un openhouse na su cede den Caya Betico Croes 110 y na Violet Center for the Arts, dependance di Muchila Creativo den Caya Betico Croes 83. 

Durante e openhouse a presenta e programa cu Colegio Muchila Creativo ta ofrece na e studiantenan, na unda nan ta wordo prepara pa comunidad den e diferente profielnan. Publico presente a haya un presentacion di e profielnan Hospitality y Beauty & Wellness. Tambe nan por a expresa nan mes durante e tayernan di Puppets y riba percussion den un drum circle.

Na Violet Center for the Arts publico a haya informacion den e diferente stand di e profielnan y nan por a haci pregunta. Tambe por a gosa di bunita musica di caha di orgel di nos studiante Jeromain Paesch hunto cu su famia. 

Durante e anochi tambe a ofrece e programa cu Violet center for the Arts lo bay ofrece desde september 2023 pa mucha, hoben y adulto. 

Un audiencia grandi a presenta na Violet, center for the Arts.  E punto culminante tawata ora a presenta e bunita cuadra gigantesco di Boy Ecury di e proyecto “Op zoek naar Boy”. E cuadra tawata pinta door di e artistanan Rudberth Wolff y Nimia Geerman.  

Den luna di Juni Rudberth y Nimia a duna un tayer na 14 hoben na unda nan a haya diferente tecnicanan y despues nan mes por a experimenta riba un canvas loke nan a siña. Na final e hobennan por a asisti tambe pa yena e diferente colornan riba e cuadra grandi, cu ta encera 5 panels. E panels cu e pintura di Boy Ecury lo wordo usa pa material educativo pa informa studiantenan di scolnan secundario tocante e historia di Boy Ecury, un heroe Arubano.  

Muchila Creativo ta hopi satisfecho cu e bon acogida di e publico y cu nan tawata tin un gran interes den e trabou cu Muchila Creativo ta ofrece.