Colegio Arubano a cera aña cu 70% di Havo y 87% VWO logrando nan examen exitoso

ORANJESTAD - Colegio Arubano ta sera un aña escolar locual nan ta considera sumamente exitoso. Recientemente a tuma lugar e anochinan di graduacion pa Havo y Vwo, esaki a tuma lugar den e Hyatt Ballroom. Durante dos anochi yena cu alegria y emocion, graduadonan di Havo y Vwo a bini huntu pa asina celebra nan gran logro. Mayornan y docentenan huntu cu rectorado, directiva, mandatarionan y demas invitadonan a pasa un anochi ameno. E aña aki Colegio Arubano su Havo a logra 70% cu a obtene nan diploma y pa Vwo 87%, sigur un percentage halto caminda cu a logra mas cu 240 alumno cu tin nan diploma den nan man. Colegio Arubano ta conoci pa ta un scol secundario riba nivel di Havo/Vwo cu alrededor di 1400 alumno, cu 65 aña di experiencia, brindando nos hobenan un formacion y preparacion riba standardnan internacional cu un personal cualifica y cu cada dia ta percura pa bin cu projectonan cu ta prepara nos hobenan cu habilidadnan di siglo 21. Colegio Arubano ta activo continuamente y ta percura pa durante aña escolar banda di su curiculo, e alumnonan participa den actividadnan social, intercambio internacional, cultural, caricativo, artistico y deportivo. Colegio Arubano a participa e aña aki den varios competencia y a logra trece back varios premio. Colegio Arubano kier a gradici en particular su personal, docentenan, alumnonan, mayornan pa e exito di e aña escolar tras di lomba y sector priva cu tambe ta yuda realisa proyectonan na beneficio di nos hobenan. Sperando cu e aña escolar 2023-2024 cu lo cuminsa na Augustus ta uno sumamente positivo y exitoso atrobe!