Van Huffelen: Si Aruba no firma e Rijkswet, e relacion cu Hulanda lo sufri hopi daño

ORANJESTAD – Mientras cu Hulanda a confirma cu awor e tin confiansa den Aruba y ta sigura cu e relacionan ta hopi bon awor, esaki por cambia rapidamente si Aruba no firma e ley di Reino.  .  Asina e secretario di estado Hulandes encarga e.o. cu Asuntonan di Reino, Alexandra van Huffelen a bisa diahuebs den e programa Noticiacla LIVE. “Sigur, mi ta experencia e relacion como hopi bon, habri, nos ta papia cu otro, nos tin discuscion pero nos ta papiando bon”, e mandatario a cuminsa bisa. Y mirando cu Aruba su punto e siman aki ainda ta cu e ta contra e ley di Reino, e chensnan pa un confrontacion, ta sigui grandi

PAKICO RAFT SI TIN CONFIANSA

Segun e mandatario, ta trata simplemente di cumpli cu acuerdonan haci den pasado recien ora cu Aruba a bay di acuerdo pa un rijkswet, pa supervision financiero. E mandatario ta referi akin na acuerdonan haci anteriormente, cu Aruba a cera cu Hulanda, pero cu awor Aruba no kier cumpli cu ne. Aruba a bisa cu e tempo ey, e la haye lomba contra muraya y no tabatin otro salida sino di acepta, pa por a haya e placa necesario pa scapa Aruba di e efectonan di e pandemia. Pero despues awor kier cambia esaki y aki ta unda cu Hulanda tin problema cu Aruba pasobra e no kier cumpli cu e acuerdo ey. Y e acuerdo ey ta cu Aruba lo a firma un RAFT. Y e ta compara e situacion manera ora cu un hende cera un acuerdo cu un banco pa un prestamo. “Bo ta haci palabracion no solamente riba e pagamento bek, sino tambe di e interes cu bo tin cu bay paga. Y mientras cu nos relacion ta mucho mas amplio cu esun di un banco, ta bon pa nos tene bista riba e desaroyo di e finansas, algo cu na Hulanda tambe nos tin, esta e supervision den varios forma. Hasta Union Europeo ta supervisa nos. Pues no ta nada nobo” e mandatario a sigui bisa. "E supervision tambe nos ta haya importante pa cu Aruba”, e mandatario a continua bisando. Aruba tambe ta haya cu supervision ta bon, solamente no den forma di un Rijkswet. 

NO TIN OTRO ALTERNATIVA

E mandatario a bisa cu ainda no ta cla cu e combersacionan aki y tin cu sigui papia riba e tema aki di Rijkswet. E la tende yen di version y tin cu ta pro y contra e ley. “Pero pa nos (Hulanda:red) en berdad ta importante pa nos bin cu un Rijkswet, y refinanciamento cu condicionan mas beneficio pa Aruba pa loke ta e interes pa Aruba, pasobra pa nos ta hopi importante pa Aruba mantene suficiente placa pa por haci inversionan cu ta necesario pa e pais” van Huffelen a sigui bisa, indicando cu si e fia placa otro caminda bou di interes halto, Aruba tin cu paga mucho placa na interes, envez di por ta usando e placa pa inversion. Pero no tin posibilidad pa otro alternativa. “Nos por discuti riba e contenido (di e Rijkswet:red) pero mester bin un Rijkswet” van Huffelen a sigui bisa. Y cu e consecuencia cu no por haci otro cu refinancia riba cu interes halto, conforme mercado internacional. Y e mandatario ta spera cu den e proximo simanan nan keda cla pa ora cu e fecha di paga yega, tur cos ta bon regla. 

RELACION DAÑA

E mandatario a bisa cu si Aruba dicidi finalmente pa no firma e RAFT, cu esey lo haci hopi daño na e relacion entre Aruba y Hulanda. “Y claro, sin un supervision financiero, esey lo trece tension den nos relacion y esey nos no ta haya placentero. De echo, nos ta spera cu Aruba lo acepta e Rijkswet pa nos por sigui padilanti hunto” e mandatario a finalisa bisando riba e tema aki. Pues, e mandatario tabata hopi cla cu no tin otro salida, cu no firma e Rijkswet, sino Aruba tin dos consecuencia cu ta warde, esta pago halto di interes cu ta coste decenas di miyones extra pa aña na gasto, y cu e relacion cu awor ta asina bon cu Hulanda, lo sufri hopi daño. 

PARLAMENTO DI ARUBA

Parlamento di Aruba a bisa caba (y gobierno di Aruba tambe awor) a bisa bon cla caba cu nan ta contra un tipo di Rijkswet, y cu nan no kier esaki pues. Y e siman aki ainda e prome mandatario a admiti cu esey ta e unico punto di discusion entre e dos paisnan den Reino riba cual cu no tin un acuerdo y cu nan no ta hayando otro. Aruba ta pensa cu na caminda por logra convence Hulanda pa acepta nan plan, y di otro banda awor, Hulanda ta hopi cla cu no tin otro alternativa cu no ta Rijkswet.