Huez a rechasa peticion pa suspende detencion di polis Vos

ORANJESTAD – E agente policial R. Vos (51 por lo pronto ta keda deteni na KIA. Acusa di por lo menos 3 cargo, e agente policial a presenta dilanti huez diahuebs merdia, unda cu a trata e caso pro forma. Aki Fiscal a informa cu ainda e investigacion no ta cla y lo por dura por lo menos 3 luna mas. Y pendiente esaki, e mester keda cera ainda pa no stroba e investigacion. A sugeri pa un otro fecha mas unda cu lo trata e caso proforma atrobe, pa despues dicidi un fecha definitivo pa e caso wordo trata integralmente. 

E CARGONAN

E agente policial Vos a keda deteni na maart di e aña aki na pia di trabou, y ta encarcela na KIA for di e tempo ey, esta ya a cumpli 4 luna di ta deteni. E acusacionan contra dje ta entre otro malversacion di placa y portafoon, cooperacion den soborno,  y labamento di placa. E fiscal a mustra cu ainda falta mas investigacion tecnico, unda cu basa riba e resultado, tin cu bay scucha mas persona envolvi den e caso aki. A compronde awe cu e caso ta uno compleho, unda cu tin hopi aparato envolvi, y mas hende, incluyendo cierto periodistanan, cu a keda suministra cu informacion via e operacion di Vos. Y Fiscal a sigura cu mester bay scucha un cantidad di persona, aunke no a bisa specificamente ken, y si esnan cu e kier scucha, ta inclui un grupo di periodista cu tabata beneficia di e operacion di Vos. 

ABOGADO

Su abogado diahuebs atardi a pidi huez pa mientras cu ta sigui cu e investigacion, y mirando e situacion personal di famia di su cliente, si huez por suspende su encarcelacion. A splica e huez cu e situacion na cas di Vos no ta bon, mirando cu a para su salario, pues no tin entrada y cu e tabata e unico cu tabata prove pa e famia incluyendo su casa. E tin dos yiu di cual un di nan tin problema psycologico cu mester di atencion y cu no por funciona normal, cual e scol a informa e famia pa medio di un carta. 

FISCAL

Fiscal a rechasa e peticion aunke a mustra compassion pa cu e situacion na cas di Vos. Ora cu huez a puntra pakico mester tene Vos encarcela mas largo, si ta investigacion technico ta haciendo, y con Vos por stroba esaki si e haya su Libertad temporal. Fiscal a splica e ora cu e investigacion tecnico, tin cu revela informacion pa cual mas hende mester wordo scucha, y si Vos sali, e hendenan no ta bay papia. Y a splica huez cu no ta trata di algun informacion colecta, sino di miles di data di informacion y combersacion cu a keda colecta cu awor a keda ‘conoci’ despues cu a logra unlock cierto di e aparatonan cu tabata wordo usa pa scucha trabou di polis. Segun Fiscal, a comparti informacion activamente di polis usando portafoon, y como tal mester ainda scucha hopi mas hende. Ademas mester desmantela varios aparato ainda via Corsou, y atrobe a subraya cu ta trata di añanan di informacion colecta. Huez e ora a compronde e situacion y a rechasa e peticion di abogado pa laga Vos bay, pero a urgi e fiscal si pa ‘traha mas lihe’ pasobra e ta tardando hopi. E proximo fecha pa trata e caso pro forma, ta dia 21 di September proximo pa 2’or di atardi. Te e momento ey, Vos lo mester keda encarcela conforme orden di huez.