Otmar Oduber a confirma su regreso activo den politica

ORANJESTAD – Despues cu e la anuncia su retiro di politica 4 aña pasa na September 2019, ex minister Otmar Oduber a confirma diahuebs merdia na noticiacla cu e ta drenta politica activo bek. E la haci esaki durante un conferencia di prensa cu e la yama pa papia riba e caso penal Flamingo pa cual e la informa cu Ministerio Publico lo a dicidi di persigui’e den e caso penal Flamingo. Con su re-entrada lo ta, ainda no ta conoci, pero cu si e ta bin bek, ta definitivo, e la sigura e portal aki. 

CONFERENCIA 

Tabata durante e conferencia aki cu e la toca e tema tambe di drenta politica bek, confirmando cu awor, basa riba tur loke ta pasando cu ne, definitivamente e ta bay drenta politica bek pa atende cu situacionan cu e la encontra y pa bringa mas bien inhusticianan cu tin riba e isla aki. Si esaki ta un partido nobo, of join un partido existente, e no sa ainda. Pero cu e ta drenta politica bek, ta definitivo, Oduber a sigura Noticiacla diahuebs. 

SU SITUACION

Segun e ex mandatario, riba pregunta di e portal aki, su salud awor si ta permitie pa bay bek den politica. Noticiacla a puntr’e si e ta pensa di drenta politica bek, con ta para e ora cu su salud, mirando cu esey tabata netamente un di e motibonan pa cual e la anuncia su retiro na September di 2019. E la sigura e portal aki cu berdad e tabatin retonan serio cu su salud, y a punta dede na su curpa, cu enberdad a conoce un cambio drastico, papiando di peso. A conoce un Otmar Oduber hopi mas flaco, y esaki tabata e reto di salud cu e la confronta. Pero e salud ta bon atrobe segun e ex mandatario, y ta dune forza pa drenta e arena politico bek. 

CON E LO DRENTA BEK

E pregunta logico e ora tabata den ki forma e lo haci esaki. A splica cu e detayesnan ey ta trahando riba dje, y tur posibilidad ta habri aworaki. Esta cu esaki por ta den forma di un partido nobo, of e por uni cu un otro partido cu ta existente caba. E la sigura cu e la tene combersacionan cu hopi hende, sostenedornan, comerciantenan y tur ta bise mescos cu nan kier pa e bolbe. E la splica cu tin te hasta esnan cu a bise cu den pasado nan no a vota p’e, pero cu awor si nan lo haci esaki y esey e la haya algo hopi bon mes. Pues ta keda pa wak den ki forma e ta bay haci esaki y con lihe. 

POLITICA Y HUSTICIA

E la anuncia mesora si cu e caso cu awor lo bin contra dje, lo no strob’e di drenta politica bek, pero, cu si dado caso e wordo haya culpable di loke ta acus’e di dje, e lo retira mesora pasobra contrario na otro politiconan condena, e si lo respeta e funccion y e posicion ey. Pues mientras cu e no ta para pa drenta politica bek aworaki mientras cu su caso ta bay cuminsa, si dado caso e wordo haya culpable, e ora e ta retira mesora. Mes momento e la sigura cu e no tin ningun duda cu e lo sali liber di tur cos, pasobra cu Ministerio Publico no tin nada riba dje. 

SU RETIRO ANTERIOR

Tabata na September di 2019 cu Oduber a anuncia  su retiro como minister y politico. Sinembargo su retiro lo a drenta na vigor te 12 di december di 2019, manera e mes a anuncia. “E curpa ta cansa” Oduber a bisa e mainta cu e la haci e anuncio, indicando cu e lo a ta bay dedica tempo na famia y cu salud ta un parti di sigur pa su motivacion pa a tuma e decision. E mandatario a pensa cu e ta haya e tempo oportuno pa retira aworaki. E momento ey, Marisol Lopez Tromp a bira e reemplazante di Oduber como minister, y Dellanira Maduro e reemplasante di Lopez Tromp den Parlamento. 

“OPZEGGING TERMIJN”

Segun Oduber, mescos cu un trahado tin un tempo pa anuncia su retiro, el a haci mescos y a pensa cu pa december tabata suficiente pa esaki. Y pa e no tende cu tin problema den gobierno, cu lo a pone cu e ta retira. Despues di 22 aña como politico activo di cual 7 aña como minister, e la haya tabata suficiente pa bay dedica tempo na su famia e tempo ey. Mientras cu salud ta un di e motibonan, (el a pasa den varios episodio cu reto di salud den e ultimo añanan), noticiacla.com a confirma di su fuentenan cu salud ta e motibo principal di su decision pa retira. Mientrastanto aworaki, Oduber a mustra cu e la perde tur cos caba, negoshi, y hasta su famia (e la divorcia recientemente di su casa) pues no tin nada mas cu bay bek den politica, y sigur pa bringa e inhusticianan cu ta pasando na Aruba.