Vrolijk: Tin 20 parlamentario, pues tin quorum pa trata ley di BBO diaranson

ORANJESTAD – “ E ley a cana tur proceso y ta cla pa ser agendeer” tabata reaccion di presidente di parlamento Edgar Vrolijk na noticiacla diamars riba e ley di cobransa di BBO na frontera cu ta poni pa wordo trata diaranson mainta . E pregunta cu hopi tabata haci ta si coalicion tabatin suficiente miembro convenci pa por pasa e ley, esta un minimo di 11 entrante diaranson, mirando cu tin un miembro di MEP cu kebrante di salud. Segun Vrolijk, e no sa si e parlamentario en cuestion, esta sra Setty Christiaans lo presenta pero tabata hopi cla tambe: “Ta 20 miembro mas tin (fuera di Christiaans)  y cu tin quorum pa trata e ley”. Pues den practica tin suficiente miembro cu ta suficiente conforme regla pa por trata e reunion. 

COALICION NO TIN MAYORIA?

E problema pa cual a tarda pa trata e ley, segun comentario riba caya, tabata entre otro e motibo cu e parlamentario Christiaans ta ausente, y cu lo no tabatin suficiente voto pa coalion (MEP y RAIZ) pasa e ley aki ora cu e keda presenta. Pero, ta mustra cu esaki lo no ta un problema ora cu e ley keda trata diaranson. Ora cu a puntra Vrolijk si e sa si sra Christiaans lo a recupera di tal forma cu e por presenta na trabou diaranson awor, su contesta tabata ‘Mi no por bisa bo”, indicando cu e no sa. E pregunta e ora ta si coalicion cu 10 aworaki, lo a logra convence un otro miembro di parlamento, den oposicion den e caso aki, sea e dosnan independiente of di partidonan existente manera MAS, AVP of ACCION21 pa pasa e ley aki cu 11, esta 10 di coalicion y 1 extra. E reunion ta programa pa cuminsa 9’or di mainta diaranson esta mayan.