Secuestro di avion SAM cu a inclui Aruba na 1973 ta bira serie riba Netlix

BOGOTA – E secuestro di avion, conoci como e secuestro mas largo di America Latina, cu a inclui Aruba na 1973, ta bira un produccion nobo di Netflix. E secuestro a inicia dia 30 di mei 1973, ora cu dos persona di Uruguay a dicidi di secuestra e avion tipo HK-1274 di Sociedad Aeronautica de Medellin (SAM), y aterisa e avion na Aruba despues di a lanta buelo for di Bogota y un parada pa fuel na Cali. 

YEGADA NA ARUBA

E avion a yega Aruba unda cu e secuestradornan a exigi 200 mil dollar y liberacion di nan compañeronan cu tabata prisoner politicos. E avion a yega Aruba, y despues lanta buelo pa Lima, pero pa motibo di problema cu fuel, a bolbe Aruba unda cu a libera algun rehen, un grupo di ciclista. Ta aki ta unda cu cos a bira interesante cu a conoce mas informacion di e secuestradornan. Despues e avion a sigui y algun dia despues, a bin termina te na Argentina, birando asina e secuestro mas largo di America Latina. Un di e secuestradornan a wordo captura y e otro no a wordo haya nunca mas. E serie ta wordo produci pa Miracol Media y lo wordo protagoniza pa actornan latino manera Mónica Lopera, Christian Tappan, Enrique Carriazo, Marcela Benjumea y Ángela Cano y lo ta un serie di 6 episodio.  Di nan tur, esun mas conoci ta Christian Tappan cu a hunga den e serie largo di Escobar, Patron del Mal, como e primo di Pablo Escobar.