Presupuesto di pais Aruba pa 2024 tin surplus di 70 miyon

ORANJESTAD – E presupuesto di pais Aruba pa 2024 ta cla y lo tin un surplus di 70 miyon florin, osea 1% cu ta conforme e norma stipula cu Hulanda. Gobierno a entrega esaki caba na e colegio di supervision financiero CAFt, segun minister di finanza Xiomara Maduro a informa diahuebs mainta durante un conferencia di prensa. E mandatario a splica cu CAFt a ricibi esaki dia 22 di juni ultimo y ta spera cu pa di dos siman di juli proximo, ta spera contesta bek di e colegio cu possible nota di cambio. 

E PROCESO

A sigui splica cu ora cu gobierno ricibi e presupuesto bek di CAFt na juli, lo haci e adaptacionan necesario pa fin di juli entrega esaki na Raad van Advies cu lo tuma su tempo pa por repasa esaki. Ora cu nan ta cla, lo manda e presupuesto bek pa gobierno cu na su turno lo mester entrega esaki na Parlamento prome cu 1 di September 2023, conforme e ley di comptabilidad. Parlamento e ora ta haya 3 luna di tempo pa trata esaki cu ta inclui aprobacion di dje pa por drenta aña 2024 cu un presupuesto aproba. 

NOVUM Y AUMENTO PA CIERTO DEPARTAMENTO

Loke ta un novum segun e mandatario ta cu prome biaha lo presenta un nota di comienso di aña y e presupuesto supletorio, envez di un nota di fin di aña. Tambe a mustra cu lo tin aumento di 50% riba e post di enseñansa unda cu scolnan lo haya mas placa awor pa por maneha enseñansa miho.