Caso sumario di Aruba Birdlife Conservation contra Embassy Suites ta fin di otro siman

ORANJESTAD – E caso sumario cu gobierno di Aruba tambe lo mester a participa aden inicialmente contra doñonan di e hotel Embassy Suites, pa loke ta e asunto di beach, ta tuma lugar otro siman diabierna mainta. E diferencia ta cu e lo tuma lugar sin participacion di gobierno di Aruba, y ta solamente inclui Aruba Birdlife Conservation (ABC), segun abogado Geert Rep. E caso ta tuma lugar diabierna 7 di juli pa 9’or y mei di mainta. E caso mester trece claridad riba kico por y kico no por, y mas aun, e supuesto daño cu e trabounan en cuestion lo ta causando na e naturalesa di laman. ABC kier proteha e parti ey tambe di laman y ta sinti cu e trabounan di construccion, e ta destruyendo e area maritimo incluyendo matanan cu ta den extinccion. 

Gobierno inicialmente a confirma pa noticiacla diabierna siman pasa cu lo hiba e compania corte pa asina un huez imparcial dicidi kico por y kico no por y kico e interpretacion legal lo ta riba e asunto. Pero despues a surgi un discussion entre e dos partnernan di coalicion unda cu prome minister Evelyn Wever Croes publicamente a pidi su colega minister un splicacion, den un tono cu tabata mustra cu e mandatario no tabata nada content cu e actuacion di su colega. E colega despues di tres ora a reacciona publicamente informacion cu tabatin un ekibocacion den e tramite di documento, cu lo a mustra porta cu ta gobierno ta bringando gobierno, pero cu realmente no ta asina. A dicidi e ora pa ‘back out’ di e caso y laga ABC so haci esaki.