A firma protocol pa independisacion di Raad van Advies

ORANJESTAD - A firma protocol pa independisacion di Raad van Advies. Fortificacion di Estado di Derecho ta hopi importante pa un pais. Y como pais, Aruba tin algun colegio halto di estado cu ta esunnan cu ta garantisa democracio di nos pais. Tur gobernacion mester tin nan colegionan halto di estado ekipa cu tur herment necesario pa haci e trabou cu nan mester haci. Organo Consultativo, Raad van Advies (RvA) ta un di e colegionan halto di estado. Y awo e ta wordo independisa. Raad van Advies ta e organo cu ta duna conseho na Gobierno y Parlamento riba tur ley cu mester pasa den Parlamento. Tanto Gobierno como Parlamento semper mester di conseho of veredicto di un Raad van Advies independiente.

Prome Minister Evelyn Wever-Croes a remarca cu desde el a drenta gobernacion, el a cuminsa cu e proceso di independisa Raad van Advies, Algemene Rekenkamer y di Parlamento. Independisacion di nos colegionan halto ta necesario pa asina nan no depende di Gobierno y por duna conseho y veredictonan obhetivo cu lo yuda democracia di nos pais. 

E leynan necesario pa haci Raad van Advies independiente a wordo pasa caba y dialuna mainta un protocol a wordo firma entre Raad van Advies, Directie Financiën, Departamento di Recurso Humano y Gobierno pa independisacion di Raad van Advies y con pa duna contenido na esaki. Raad van Advies por busca e personal cu e tin mester cu ta cualifica y e proceso aki no mester pasa via Gobierno mas. Tambe Raad van Advies mes lo maneha e presupuesto cu e ta haya anualmente den e presupuesto di Gobierno di Aruba cu ta pasa Parlamento.