Croes: Lo ubica alumnonan di Graf von Zinzendorf School den edificio John Wesley College

ORANJESTAD -  E mandatario di Enseñansa Endy Croes a informa cu e edificio di John Wesley ta keda habri y lo realoca otro scol resorta bou di SPCOA na e edificio aki. Noticiacla a compronde cu ta trata aki di Graf von Zinzendorf School. Segun e mandatario ningun mucha a keda sin scol y ningun docente a keda sin trabou, mirando cu SPCOA a percura pa aloca tur na otro scol. 

CERA JOHN WESLEY

A surgi henter un polemica recientemente ora cu a bira conoci cu SPCOA a informa cu ta bay cera John Wesley, debi cu tin un scarsedad di alumno na e scol y no ta rendabel mas pa tene e scol habri. E asunto a haya un tinte politico mesora ora cu partidonan di oposicion a culpa gobierno actual di e problema, mientras cu gobierno di su banda a sigura cu no ta nan, sino e fundacion Protestant bou di cua e scol ta cay, a tuma tal decision.