Van Huffelen ta ok cu mocion contra refinanciamento beneficioso pa Aruba sin RAFT

DEN HAAG – Secretario di Estado Hulandes responsabel pa Relacion di Reino Alexandra van Huffelen a sosten e mocion di Tweede Kamer diaranson mainta durante un debate riba e tema di RAFT y e pago bek di Aruba di e debe di ayudo di likidez. E mocion a keda presenta pa miembro di VVD, Roelien Kamminga . “Pa nos esey enberdad ta importante pa nos” Van Huffelen a contesta, riba e mocion cu ta recorda Aruba cu Hulanda por ofrece refinanciamento bentahoso pa Aruba solamente si e cumpli cu firmamento di e ley di RAFT. “Pa nos e supervision financiero tambe ta importante” e mandatario a sigui bisa. “Esey tambe lo mester ta inclui den un Ley di Reino (Rijkswet), manera cu bo ta sugeri” e la sigui bisa e miembro di parlamento Kamminga. 

MUCHO DISCUSION

Segun e mandatario Hulandes, e combinacion di un ordenanza nacional (Landsverordening) y e protocol cu ta regula e supervision financiero, ultimo añanan (3 aña:red) enberdad a crea mucho discusion. “Un ley di Reino ta mara tur partido y ta brinda e pais (Aruba:red) un financiamento bentahoso di inversionan, pasobra esey simplemente ta indica cu tin supervision di e finanzanan”. Mescos cu pa e otro islanan, e ley di reino tambe tin un determinacion final segun e mandatario Hulandes. “Si e finanzas publico a duradero y den orden, e ora e supervision lo no ta necesario mas” Van Huffelen a sigura Tweede Kamer. E la admiti tambe cu enberdad manera cu Kamminga a recorda, cu Aruba mester cumpli cu e palabracionan haci y cu Aruba a haci palabracion basta tempo pasa pa firma un ley di Reino asina. “E concepto ta cla masha tempo caba, no solamente den Tweede Kamer, sino tambe na Parlamento di Aruba” e la sigui bisa. “Mi ta tene mi mes tambe cu e palabracionan cu nos tin cu traha cu otro riba refinanciamento, wordo combina cu un ley di Reino pa supervision financiero. Pesey mi kier duna e mocion aki tambe un sosten pa Tweede Kamer” e mandatario a finalisa bisando. OTro siman diamars Tweede Kamer lo vota pa e mocion aki pa wak si e ta pasa of no.

KICO TA E EFECTO

De facto, e mocion no tin mucho cos nobo, otro si Aruba mustra progreso pa cu e firmamento di e ley di Reino mes, Hulanda no duna Aruba un prestamo cu beneficio abou automaticamente, sino duna un prestamo cu interes normal cu ta pas. Ta te ora cu e ley wordo firma y e drenta na vigor, Hulanda por duna Aruba e refinanciamento cu beneficio di interes abou. Loke e mocion no ta haci, ta prohibi Aruba di busca financiamento otro caminda cu no ta Hulanda, cu e consecuencia cu e tin interes halto pa paga. Si e mocion tabata structura different, esey lo tabatin un otro impacto riba Aruba, pasobra esey lo a obliga Aruba di fia via Hulanda so. De hecho, Kamminga tabata desapunta biaha pasa den van Huffelen cu a duna Aruba e opcion pa refinancia pafo di Hulanda, aunke cu tin cu paga mas na interes. Pero, e no a mara esaki den e mocion. Di otro banda, e mocion ta pone presion si riba Aruba pa firma e ley pa caba, y cu e tin e rosea di Tweede Kamer pa tene cuenta cune, aunke cu Aruba no ta obliga pa firma e ley y ta liber pa busca un refinanciamento aunke cu interes mas halto, conforme e mercado internacional. 

MALCONTENTO

Manera cu Noticiacla a raporta mas ariba caba e punto tabata cu e parlamentario Kamminga tabata mal contento cu e hecho cu secretario di es tado Hulandes Alexandra van Huffelen a laga e condicion cay cu Aruba por haya refinanciamento solamente si Aruba firma e RAFT actual cu tin riba mesa. Van Huffelen a bisa cu si Aruba no firma, e ora e tin cu busca refinanciamento otro caminda contra un interes mucho mas halto. Esaki contrario na e exigencia anterior cu Aruba por haya refinanciamento solamente si firma cu Hulanda. 

ACUERDOTabata na 2021 cu Hulanda y Aruba a yega na un acuerdo pa ancra e ley di supervision financiero den un Rijkswet. E ley a keda redacta y presenta na Parlamento, cu aprobacion di gobierno di Aruba. Sinembargo, Parlamento a rechasa e version ey y e cos a keda pega. Mientrastanto gobierno a sostene parlamento di Aruba y tampoco kier e RAFT aworaki mas. Ora cu van Huffelen a menasa cu no por tin discusion pa refinancia e debe di ayudo di likides di Covid, Aruba no a spanta ni keda impresiona. Den un debate na Hulanda despues, e secretaria van Huffelen a sorprendi e miembronan di Tweede Kamer cu e ta dispuesto pa refinancia e debe cu Aruba, aun si ta cu interes basa riba mercado internacional, enves di uno mucho mas abou. 

MOCION

E formato di debate di awe mainta a permiti e fraccionan participe pa entrega mocionan cu por mara man di e secretaria van Huffelen posiblemente, cu na su turno por impacta e proximo accion di Aruba.